Minister President Eman a ricibi buki: ‘E Negoshi di Koffie na Aruba’

Pa Minister President Mike Eman, como titular tambe di Cultura, tabata un placer di ricibi periodista y autor local Benjamin Romero.

Romero a haci entrega oficial di un copia di su buki titula: ‘E Negoshi di Koffie na Aruba.’

Den sala di Conseho di Minister na edificio Cocolishi, Premier Eman y Romero a comparti un combersacion ameno.

 

“E tabata pa mi un honor pa haci entrega di mi buki na Prome Minister di Aruba, e ta un parti di historia conta for di e angulo social economico con tabata e negoshi di koffie cu a tuma lugar riba nos isla pa mas di tres decada.

Mirando tambe Minister su vision di crea un hub pa Aruba, mi ta kere cu tabata cuadra cu esey,” asina e autor local a bisa.

 

Minister President Eman di su banda a expresa su satisfaccion cu e parti di historia aki no ta bay perdi.

Basa riba esey, e autor a haci un apelacion n’e mandatario pa dedica un espacio den Museo Industrial n’e capitulo di negoshi di koffie na Aruba.

Premier Eman ta wak merito n’e peticion a indica di lo canalisa e deseo aki.

 

“E parti aki di nos historia ta demostra e capacidad y vision di nos hendenan,” Benjamin Romero a indica.

Na final di e encuentro entre Premier Eman y e autor local, e ultimo aki a scirbi un dedicatoria special den e copia cu a obsekia.

E buki ta obtenibel na De Wit, Van Dorp, Coffee House y tambe na Coffee Break.

 

Top