Minister President Mike Eman: Bushiri ta bira Beach Publico mescos cu Arashi

 

Fin di siman Prome Minister Mike Eman a bishita area di Bushiri Hotel, despues cu el a anuncia e desicion cu a tuma den Conseho di Minister siman pasa.

E decision ta ensera cu cu ta kita e edificio y destina e sitio aki como un area pa recreacion publico y un beach cu aceso pa publico.

 

Durante e bishita cu Prome Minister Eman a haci na loke tabata un tempo Bushiri Hotel, el a wordo acompaña pa, e.o., arkitecto Rafy Kock. Segun Eman, a scoge e hoben arkitecto pa diseña e espacio publico nobo aki pa pueblo di Aruba.

Eman a splica di ta contento di por tin ingeniero Kock den e proyecto aki, pa motibo cu tin un bon experiencia di su trabou.

Den pasado e hoben arkitecto aki a diseña Linear Park, cu a resulta den un proyecto espectacular pa recreacion publico pa pueblo.

 

“Y ainda nos ta desaroyando Linear Park como espacio publico,” Prome Minister Eman a splica, mustrando riba e ekiponan pa ehercicio cu ta instalando riba henter Linear Park.

Prome Minister Mike Eman a splica cu, tempo e Gobierno anterior a destina un di e ultimo pida beach publico pa construccion di Ritz Carlton, nos no tabata contento.

 

“Un Ritz Carlton ta un joya pa Aruba, pero e mester a re-emplasa un hotel existente y no tuma un di e ultimo beachnan publico,” Eman a enfatisa, “pero esey ta historia y awor nos tin e oportunidad di corigi e eror di e Gobierno anterior, dunando pueblo un area bek cu tabata hotel y debolbe como un beach publico.”

Prome Minister a splica cu e area ta bay bira un area similar na Arashi y Linear Park. Un beach cu aceso publico, pero cu ta inclui aspectonan di recreacion y un diseño atractivo pa henter famia.

El a sigui splica cu ta pensando riba areanan pa deporte den aire liber. Aki por pensa riba facilidadnan deportivo.

 

E idea principal ta cu e ta bira un lugar di recreo pa henter famia, di chikito te grandi y den aire liber. Hunto cu arkitecto Kock, sr. Eman a splica, cu ta explorando tambe e posibilidad pa inclui un ‘skate park’.

Minister President Mike Eman a bisa cu Gobierno kier realisa e proyecto aki cu contribucion boluntario di pueblo.

“Manera nos a rescata Bestuurskantoor den nos prome luna di gobernacion. E tempo ey Aruba a bin hunto di un manera boluntario pa salba un patrimonio historico y di pueblo henter. Mescos nos t’ey haci aki.

 

“Hopi t’esnan cu a y ta acercando Prome Minister Eman caba cu idea riba nombernan historico di e diferente partinan di e costa na altura di Bushiri, manera “Mambo Beach” y otronan. Hopi kier duna contribucion den forma di e mata pa planta n’e sitio, yuda cu e areanan di recreacion y deporte na e sitio.

“N’e sitio mes tin hopi mata cu nos ta bay percura pa salba y duna un chens nobo pa sigui crece como parti di e parke.”

E area tin ainda hopi mata di druif cu ta bastante afecta pa falta di cuido, tambe matanan di coco, pero cu tambe mester atencion rapido.

“Nos lo cuminsa di biaha. Tin un entusiasmo grandi pa cu e decision aki,” Minister President Mike Eman a splica, claramente entusiasma cu e apoyo cu e y su Gabinete ta haya p’e decision di haci Bushiri un area publico cu aceso liber pa lama, cu acomodacionnan pa deporte y recreo pa tur famia na Aruba.

 

 

Top