Minister Presidente hibando nos pais den direccion di dictadura” segun Marisol Lopez Tromp di POR

Drs. Marisol Lopez-Tromp a splica den rueda di prensa di partido POR, Plataforma Forza Nobo, cu tin hopi hende den servicio di Gobierno of empresanan estatal, cu n’e momentonan aki ta sinti nan mes menaza.

E ta haya cu Minister President of Gobierno ta lubida den e caso aki ta bo por pretende di duna un opdracht, pero ora algo bay robes, no ta abo ta carga e culpa di esaki, sino e persona cu a haya e mandato.

Esun ta carga un responsabilidad huridico y profesional, e hunto cu henter e grupo ey, ta carga e responsabilidad di e toma di decisionnan.

 

Y n’e momento cu Minister President ta kere cu e por forza cosnan contra reglanan di bon gobernacion, contra statutonan di diferente lugar, contra regla, cu tin proceso cu tur hende sa cu den e instancianan aki nan tin cu tene cuenta cune.

Na momento cu Minister President ta sinti cu e por haci esaki, algo completamente fuera di sla ta tumando lugar den nos dushi pais Aruba, Marisol Lopez-Tromp a menciona.

 

E consecuencia di esaki, segun el a splica, ta cu ora nan ta wordo forza na haci cosnan cu kizas ta contra e procedura, no ta loke nan tin planea, no ta regla den ley of estatuto loke nan mes tin cu respeta, bo ta haya un situacion caminda cu na momento cu Prome Minister of Gobierno ta haya cu no ta bon loke nan a haci, ta dicidi sin mas di hala nan un banda of retira nan.

Ta cua profesional na Aruba ta haya gana di sigui eherce un responsabilidad asina aki?

 

Porcierto, no tur ora nan ta wordo paga p’e, nan ta laga pago un banda y ta pone nan tempo y nan conocemento pa un instituto of instancia, pa haci un trabao cu tur e tempo a bay bon, cu mester ta di un forma respeta y di un dia pa otro sin un motibo valido finalmente ta wordo kita of hala o retira, Lopez-Tromp a bisa.

El a sigui puntra ta cual profesional cu ta respeta su mes y cu ta motiva pa haci un trabao kier sigui e pasonan di esnan cu a wordo kita?

Si e sa cu e motibo pa cual nan a wordo kita, no ta pasobra nan a faya. Al contrario nan a luci cu tur e trabao cu nan a haci tur e tempo.

 

Sra. Lopez-Tromp a sigui acentua cu no ta pasobra nan a comete un eror contra ley, al contrario nan tin cu proteha nan instituto pa un Minister cu ta mete den nan trabao contra ley. No ta pasobra nan a haci algo cu pa Aruba ta robes, al contrario bo tin un Minister Presidente cu por drenta den cierto compania, y hasta tuma e trabao over di nan empleadonan.

Por ehemplo, Minister Presidente ta kere cu ta bon cu e por drenta den tur bario pa haci instalacion di luz, aki poco dia e trahadornan ey no ta bay tin trabao mas, pasobra Minister Presidente a kita tur nan trabao for di nan.

 

Esey e ta haci den cada bario y na final bo no tin 300 proyecto, bo tin 300 luz cu el a cambia, el a bisa.

Marisol Lopez Tromp mas leu a comenta: “Ban ta serio. Na momento cu bo ta den aña electoral, nos tur sa cu tur Minister kier mustra e trabaonan cu nan a haci, pero e ta bira hopi grave na momento cu nos Minister Presidente no tin placa riba su presupuesto pa haci cierto trabao, pasobra e mes a faya na cumpli cu cierto norma y reglanan, anto kico bo a haci?

Bay na instituto of instancianan priva, no solamente comerciantenan, pero e ta drenta den bo compania estatal pa forza nan pa paga cosnan pa Gobierno cu generalmente ta tarea di Gobierno pa tine den su presupuesto.

 

Segun’e, debi cu e lider di AVP a haci un campaña of e kier luci cu cosnan e ta bay forza of duna opdracht na empresanan estatal of institutonan, pa paga cosnan cu no ta nan tarea primordial, cu no ta loke nan mes tin gana di dedica na dje, pasobra nan tin otro metanan cu e placanan ey, no kier tuma tampoco e persona cu bo kier pone pa traha cu nan, cual no ta bo tarea tampoco, y asina ta keda haci y deshaci den bo pais.

Aki poco dia ta bay yama bo den bo cas bisa bo ki bo tin cu haci den bo kamber, Marisol Lopez Tromp a laga sa.

 

El a mustra tambe cu e direccion aki cu Minister President ta tumando ta uno hopi peligroso pasobra e ta bay den direccion di dictadura, y nos tin un ehemplo banda di nos den un pais bisiña kico t’e consecuencianan di un dictadura!

 

Top