Minister Presidente Mike Eman a bishita tur pier y dialoga cu piscadornan pa apoyo y impulsa e sector

 

Como Minister encarga cu sector primario cu ta inclui e industria di pesca, Prome Minister Mike Eman a realisa diadomingo mainta un recorido na e diferente pier na e costa zuid di nos isla.

 

For di Seroe Colorado pa Hadicurari, Minister Presidente a inspecciona e facilidadnan y papia cu e piscadonan local. E obhetivo di e actividad ta pa haci un inventarisacion di e condicion di e piernan, como tambe peticion di e piscadonan. Representantenan di Departamento di Agricultura, Cria y Pesca y tambe di Centro di pesca Hadicurari, a compaña Premier Eman den e bishitanan.

 

Na cada un di e paradanan haci, usuarionan di e facilidadnan a brinda Prome Minister Eman un bon bini y tabata hopi habri pa papia di e facilidad, con por mehora nan y tambe algun idea di con pa stimula mas persona pa tuma e practica di piscamento y preserva e ofishi aki pa futuro. Na waf di Rodger’s Beach a papia cu Ernulfo Beaumont y Kenneth Werleman, kendenan a splica cu e pier mester di reconstruccion pa drecha e daño haci pa e elementonan.

 

Na pier di Noord Cura Cabay, Prome Minister a inspecciona e trabounan cu ta wordo haci pa embeyecemento di e beach aki, pero tambe e construccion di e facilidad pa piscadornan.

Aki a combersa cu Carlos Harms y Romeo Janga. E persona encarga di parti di Hadicurari, esta Ruben Willems, a guia e mandatario dor di e bishita y a yuda transmiti e deseo di e piscadornan.

 

Despues a sigui pa pier di Spaans Lagoen caminda Prome Minister a combersa cu varios piscador, entre nan Marilu Carrion. Aki a tuma nota di varios trabou cu ta necesario y hunto cu Alex Farro, kende ta e persona di contacto di Hadicurari, ta bay coordina un ke otro pa brinda e usuarionan e miho espacio posibel pa realisa nan actividadnan.

 

Na Waf di Rancho, na Oranjestad, Minister Presidente a papia cu Pedro ‘Pikine’ Bislip y Ruben Marin, como tambe Hedwiges ‘Wiwi’ Marchena. E pier akinan, ta den un bon condicion, sin embargo, e piscadornan ta haya falta di awa dushi pa laba instrumentonan y un gazebo, e. o. peticionnan cu a keda nota pa hunto cu e instancianan concerni, traha riba nan.

 

E recorido di diadomingo a finalisa na e pier grandi di Hadicurari caminda Prome Minister a dialoga cu e usuarionan y asina a haya sa di e situacion fastioso cu ta confronta cu operadornan di deportenan acuatico y e necesidad pa miho control, e. o. aspectonan.

Premier Eman a compromete cu cada un di e piscadornan cu ta bay tuma carta den e asunto pa yega na un solucion satisfactorio pa tur partido.

 

Den conclusion, e recorido tabata uno masha informativo caminda Prome Minister Eman a haya sa hopi mas di e sector di pesca y awo por sinta na mesa cu tur e departamentonan al caso pa stipula un plan di accion. Entre e obhetivonan primordial di Premier Eman mes, ta pa stimula e produccion local pa e propio mercado local y esey naturalmente ta rekeri sosten di e banda di oferta, pero tambe di e banda di demanda, esta di e consumidor.

Top