Minister Presidente Mike Eman: “Rosa College ta continuacion di un lista pa renobacion di Oranjestad y di producto Aruba den su totalidad”

Inaugura na 1863, e prome parti di Rosa College ta otro monumento historico cu ta importante pa rescata y restaura. Na mesun momento ta sigura cu e scol basico den centro di ciudad por keda ricibi generacion di alumnonan pa e siglonan nos dilanti. Esaki ta e trabou cu Gabinete Mike Eman II ta haciendo pa pueblo di Aruba.

Prome Minister Mike Eman a resalta e hecho cu e scol ta bin riba e lista, ya largo, di edificio y espacionan publico cu ta renoba den e capital Oranjestad.

 

Cuminsando “for di La Salle y Dominicus College, bo tin tambe e misa (San Francisco) y Maria College cu a conoce renobacion grandi; bayendo pa Emanstraat caminda tin edificio di Corte y Watertoren y na e momentonan aki edificio di ex Voogdijraad, cu den pasado tabatin Censo y Eilandsraad, ta un edificio cu a yega na acuerdo cu Renobacion Aruba N.V. cu lo tuma e restauracion riba su mes y den e edificio aki lo bin Departamento di Automtisacion (DIA)”, Prome Minister Eman a splica.

 

Mas leu ta bin henter e renobacion di Caya Betico Croes y despues bo ta yega na tur e edificionan monumental cu a wordo restaura of mantencion grandi a wordo haci. Aki ta referi na Bestuurskantoor, Parlamento di Aruba, Oficina di Gabinete di Gobernador, Fort Zoutman, Stadhuis, e edificio unda ta Rekenkamer hunto cu Plasa Padu, Museo Arkeologico y Havenmeesterkantoor. Despues bo ta yega na henter e area di boulevard unda pariba ta haya Linear Park y pabou Schelpstraat pa drenta Caya Grandi y Paardenbaai Plasa cu ta na entrada di waf, Plasa Rancho y Rancho mes cu tambe ta conociendo un renobacion di Kowloon bay abou.

 

Minister Presidente Eman a indica cu, “Tur esaki ta forma parti di e vision di renobacion di centro di ciudad y renobacion di scolnan, di barionan cu ta hiba nos na Yuwana Morto pa Madiki y Seroe Patrishi. Recientemente nos a haci Semeleerestraat, Ranchostraat y Village Fase 2.

Asina e renobacionnan ta continua basa riba un vision di un Aruba caminda nos ta ofrece hende un calidad di bida den su mesun bario.”

 

Adicional na construccion di scolnan nobo, Gabinete Mike Eman ta pone enfasis riba renobacion di scolnan existente y restauracion di esnan cu ta un monumento historico y ta forma parti di e renobacion di Oranjestad. Mescos ta conta pa edificio di ex scolnan y otro instancia publico cu ta haya un bida nobo manera ex John F. Kennedyschool y ex-DOW cu lo bira sede di Departamentonan di Enseñansa y Aruba Tourism Authority respectivamente.

Leave a Reply

Top