Minister Richard Arends: “AIB ta haciendo un estudio detaya di e efectonan economico di CITGO” E raport lo keda cla dentro di poco

Durante conferencia di prensa Minister di Asunto Economico, Richard Arends a papia riba su maneho p’e aña aki, el a papia di CITGO, presupuesto y tambe con e perspectiva ta pa 2017. Richard Arends a bisa cu Gobierno tin masha confiansa cu e crecemento economico di 3,4% p’e aña aki cu a wordo calcula dor di Banco Central, por wordo surpasa.

 

“Nos tin pleno confiansa cu nos ta logra esey, manera cu na 2015 y 2016 a logra e presupuestonan manera stipula. E presupuesto e aña aki tin un deficit historico di 0,5%, un paso mas cerca di e presupuesto balansa.”

Richard Arends a splica cu pa por cuantifica e impacto economico cu e refineria tin na Aruba, Minister Mike de Meza a duna instruccion na AIB pa haci un estudio.

 

“Na 2006 caba Valero a pidi AIB pa haci un investigacion riba e impacto socio economico di e refineria na Aruba.

E tempo ey a calcula cu e refineria ta contribui cu entre 12 pa 15% di GDP den nos economia. Awor nos a pidi AIB pa haci e estudio di nobo, pero hopi mas detaya.

Detaya pa loke ta entrada via contratista y empleadonan pa cu Gobierno.

 

E tempo di Valero esaki tabata mas o menos 90 miyon florin. Valero y tur e contratistanan tabata contribui na caha di Gobierno.

Ademas di esey awor tin e ‘minimum tax payment’ di 10 miyon dolar.” Richard Arends a enfatisa cu a pidi AIB pa ta un tiki mas specifico riba esey.

Di CITGO, Aruba Refinery Gobierno a haya informacion y tambe di Refineria di Aruba NV (RDA) pa valida cierto informacion.

Na 2006 Valero tabata un refineria den operacion y CITGO ta un refineria cu mester cuminsa opera y mester tene cuenta cu e timeline pa loke ta trata e proyectonan.

RDA ta participa den educacion di empleadonan cu ta encera om-, her- en bijscholing.

 

“Nos a pidi AIB pa haci un estudio hopi profundo y detaya pa nos sa kico t’e efecto adicional di reapertura di e refineria.

Nos ta spera di haya resultado di e estudio e siman aki ainda. E ta un estudio publico y tur hende tin aceso na dje.

CITGO ta cumpliendo cu su obligacionnan, cu huur, belasting, cu e timeline di rehabilitacion y e ta wordo monitorea diariamente dor di RDA.”

 

Minister Richard Arends a bisa cu hunto cu Minister Mike de Meza, Departamento di Asunto Economico y su Ministerio ta sigui traha hunto pa por tin un bista basta amplio riba e timeline cual ta indica e cantidad di placa cu ta wordo hinca den economia.

Tanto pa loke ta energia como turismo pa mira con e inversionnan cu tin planea pa 2017 ta tuma lugar pa Gobierno tin un maneho con dirgi economia for di Gobierno como facilitador.

 

Top