Minister Richard Arends, contrario na opinion di MEP: “IMF a anuncia cu a partir di e aña aki e actividadnan economico di Aruba ta mehora”

Raport preliminar di IMF a keda cla y ta positivo. Minister Richard Arends, encarga cu Asunto Economico y Comunicacion, hunto cu Prome Minister Eman y Minister di Finanza Angel Bermudez  a splica algun detaye di e raport aki.

Pa Minister Richard Arends ta di 4 bes cu e ta atende cu un mision di IMF, prome como consehero y awor como Minister.

 

“Aruba, como miembro di Reino Hulandes, semper tabata cay bou di e region di Europa Occidental y awor pa prome bes ta resorta bou di e region di Caribe.

Esaki ta haci e comparacion cu demas pais cu economianan similar hopi mas facil.

Mi mes tambe a experiencia e mision aki hopi placentero. Nos a hiba discusionnan masha interesante.

Ekipo di IMF a comparti modelonan cu nos y a duna nos un palet di costonan den termino economico di cada reforma.

 

IMF a indica cu nos economia a slow down e ultimo tres añanan, dor di turismo y primordialmente turismo di Venezuela cu a cay.

Pero, tambe e analistanan indica cu slow down economico aki ta debi n’e hecho cu Aruba su deficit a bira menos y ta bayendo den un surplus.”

 

Richard Arends a splica cu tur e deficitnan cu Gobierno tabatin, bon of malo, ta fondonan cu tabata circula den e economia.

“Un dado momento, ora Gobierno ta bay corta gasto, menos e por contribui na actividadnan economico.

IMF a indica cu e resultadonan economico di e ultimo tres añanan ta debi na turismo cu a baha y e consolidacion fiscal cu Gobierno tabata tuma pa reduci e deficit y debe di pais Aruba, semper manteniendo e balansa.”

 

Arends ta masha contento di por anuncia cu IMF tin elogio p’e forma di traha di Gobierno y ta premira cu a partir di e aña aki e actividadnan economico lo mehora. Esaki ta debi no solamente na e proyectonan publico priva cu tin aworaki, pero tambe turismo cu ta lantando cabez bek y mas cu tur reapertura di e refineria.

IMF a indica cu e maneho energetico di Aruba cu tin un componente economico hopi grandi, tambe a yuda pa por a garantisa un crecemento economico.

 

Minister Arends a menciona e critica cu IMF tabatin riba e.o. su Ministerio y algun colega.

“E ta un critica constante cu ta ensera flexibilisacion di e mercado laboral. E red-tape cu tin pa establece un negoshi y e gastonan pa haci negoshi aki na Aruba.

IMF tambe a ripara durante e discusionnan cu gremionan – dos siman largo di reunion – cu tin señalnan mixto.

Tin gremio ta haya cu mester bira mas flexibel y otronan juist no y ta haya e red-tape un bon filter y asina tabatin varios opinion y argumentacion”.

 

Minister Richard Arends a bisa cu loke ta bon ta cu Departamento di Asunto Economico por a prueba cu a reduci substancialmente e tempo di espera pa haya un vestigingsvergunning.

“Mi ta hopi satifecho di e conclusionnan preliminar hopi balansa. Aki un par di luna e raport final ta keda cla.”

 

Top