Minister Richard Arends cu splicacion amplio riba defict y debe nacional: “Tur loke Gobierno aki ta haci ta bay gradualmente; ningun reforma mag di tin un shock ni economico, laboral ni social”

Minister di Economia, Richard Arends a duna un splicacion amplio encuanto e diferencia entre deficit y debe nacional. Un pregunta cu semper bay ta bin dilanti.

Minister Richard Arends kier p’e comunidad ta bon informa riba e materia aki, ya cu esaki ta concerni nos tur.

 

“Esaki ta un tema cu semper ta bin dilanti. Tempo mi tabata traha como consehero caba y awor como Minister mas ainda. Sigur p’e politica cu ta wordo hunga rond di e tema aki y cu Gobierno lo ta pasa e cuenta aki pa nos futuro generacionnan.”

Minister ta splica: “Un economia ta consisti di consumo, di inversion y tambe di importacion y exportacion. Na aña 2010 Aruba tabata mei mei di un crisis.

Un crisis internacional cu a afecta consumo y inversion na Aruba. Pa motibo di e crisis economico nos turismo a bay atras, e refineria tabata sera y tambe inversionnan priva tabata na su minimo.

 

Gobierno di su banda a cuminsa pusha y haci inversionnan riba su mes. Na momento di e crisis tabatin un evaporacion di mas di 700 miyon florin di nos economia di cual 100 miyon a toca caha di Gobierno directamente.

Di un momento pa otro nos tabatin 100 miyon menos den caha di Gobierno. Gobierno a opta pa inverti enbes di austerisa.

Cualkier Gobierno cu a drenta na mando n’e momento ey tabatin dos opcion y nos a wak e rond mundo. Of inverti of austerisa.

Gobierno por a scoge pa corta den beneficionan, den salario, den AZV, pensioen of por a scoge pa inverti. Gabinete Mike Eman a scoge pa inverti.”

 

A inverti den economia, den infrastructura, den areanan publico y den energia. A amplia espacio financiero di empresanan y a aumenta poder adkisitivo di famianan.

“Gobierno a keda sin cobra dividendo di companianan di utilidad p’asina e companianan aki tabatin espacio pa inverti y esaki a percura tambe pa un reduccion substancial di e tarifanan di awa y coriente loke a percura pa entrada disponibel di famia y negoshinan.

Obviamente den e periodo aki bo ta crea un deficit, pasobra bo gastonan ta keda manteni, mientras cu bo entradanan ta menos.

Pa cubri e deficitnan aki, Gobierno tin e posibilidad di fia riba mercado local y internacional.

Aunke disminuyendo tur aña, e deficitnan ta suma riba e debe nacional.”

 

Minister Richard Arends a bisa cu recientemente tabatin un publicacion den cual ta indica cu consumo di sector publico a baha y esaki ta pasobra e deficit ta reduciendo gradualmente.

Na 2013 pa 2017 tin un reduccion di casi 500 miyon florin di nos deficit. Esaki kier men 500 miyon florin menos cu nos mester fia, pero tambe 500 miyon menos cu ta lora den nos economia.

No lubida cu Gobierno tambe ta un actor den economia. Tur e debenan aki ta placa cu ta keda lora den nos economia, pasobra Gobierno tambe ta inverti, ta cumpra servicio y asina participa den e economia.

“E debe ta wordo midi n’e proporcion di bo economia. Aunke cu bo debe a keda mescos, den un economia cu a cay, e cifra cu bo ta dividi e debe ta bira mas abou y e resultado matematicamente mas halto.

Na momento cu bo economia crece e proporcion aki ta bolbe subi. Esaki ta algo cu nos ta wak cu crecemento economico modera.

Sinembargo, manera CAFT a caba di indica, nos ta na punto di tin un perspectiva di reduccion di e debe nacional. Esaki ta algo historico.

Na 2018 e deficit ta bira un surplus cu ta 50 miyon riba zero. E placa aki ta bay directamente pa reduci e debe nacional.

Un combinacion di e reduccion nominal di e debe dor di e surplus, sigui pa un crecemento economico modera y si logra haya fiansa na un interes mas razonabel, den un periodo hopi cortico nos lo ta na normanan internacionalmente aceptabel pa loke ta trata e quota den proporcion cu nos economia.”

 

Richard Arends a bisa cu esaki ta un liña hopi cla den Gabinete Mike Eman I y II. Tur loke nos a haci, manera e reformanan pa drecha finanza publico a bay gradualmente.

“Ningun reforma mester tin un shock economico, shock laboral ni tampoco shock social.”

Leave a Reply

Top