Minister Richard Arends den su discurso na E Business Seminar “Digitalisacion ta remodelando nos economia”

 

Diasabra den Renaissance Convention Center tabatin un E-Business Seminar riba entrepreneurship, social media y mobile marketing.

Minister di Asunto Economico Richard Arends a habri e seminario cu un tremendo discurso. El a enfatisa riba e topiconan di e seminario cu ta entrepreneurship, pero tambe di asuntonan cu no tabata relevante, awendia no por sin nan mas cu ta social media ora di haci negoshi y mercadeo mobil.

Den e parti aki Minister Richard Arends ta elabora riba e rol di facilitador di Gobierno.

 

Minister Arends a splica cu desaroyo tecnologico pa futuro ta demasiado importante pa tume como algo facil. Specialmente e “economia di experiencia” cu e consumidornan ta demanda y cu a bira parti di nos bida diario.”

Minister Richard Arends: “E perfil di e turista cu ta bishita nos awendia a cambia, pero mescos tambe e demanda y expectativa di nos propio consumidornan.

Pasco cu a pasa un cantidad super grandi di pakete a wordo besteld on line for di Aruba.”

Cu esaki Arends kier ilustra con digital network a trece cu ne oportunidadnan na granel. Digitalisacion ta loke ta conta awendia. Brinda WIFI den areanan comercial lo nifica hopi pa e isla aki.

 

“Mi kier djis ilustra cu banda di retonan, nos tin oportunidadnan: Digitalisacion ta re-modelando nos economia.

Como Minister di Asunto Economico y Comunicacion mi kier pone mas atencion n’e asunto aki y facilita uzo di tecnologia como un tool pa hiba e economia na un nivel mas halto. Gobierno ta dispuesto pa facilita y tuma un paso mas aleu.

Nos lo kier sigui preserva e interes di e entrepreneur.”

 

“E-commerce ta un potencial cu mester wordo explora ainda na Aruba. No solamente e ta hiba nos ta over di e top economico, pero tambe e ta haci negoshi menos costoso y mas eficiente, ta promove e competitividad di e isla y ta contribui grandemente n’e experiencia economico.”

Na final di su discurso Richard Arends a recorda esnan presente cu na cualkier momento di dia mas di 60 mil hende na Aruba ta riba FB, mas cu mitar di e poblacion.

 

“Uzo popular di social media den nos negoshi di cada dia lo sigui crece y ta cambia e actitud di e consumidor y brinda demanda p’e ‘experiencia economico’.

Mi ta aplaudi y elogia e organisadornan di e evento aki, e panelista, orador y participantenan di conferencianan asina pa haci e-commerce un discusion nacional mas amplio.

Eventonan asina ta importante pa trece grupo di hende hunto: Hende creativo, entrepreneur, local y expertonan internacional.”

“Hunto nos mester uni forsa pa construi un ‘Economia basa riba conocimento’ cual lo t’e diversificacion di e economia cu nos ta haci tur esfuerso pa tin.”

 

Despues di su discurso alentador Minister Richard Arends a desea tur presente un mainta inspirativo y fructifero.

Top