Minister Richard Arends na Expo Labor – “Gobierno tin tarea pa yuda un hende establece un negoshi y tambe con drenta mercado laboral”

Minister Richard Arends hunto cu su colega Angel Bermudez a haci apertura di Expo Labor diasabra ultimo. Esaki ta un iniciativa cu a cuminsa aña pasa caba.

Richard Arends a bisa cu Gabinetenan Mike I y II a inverti masha hopi mes den oportunidadnan.

“No solamente oportunidadnan pa progreso, pero oportunidadnan pa empleo. Esaki ta algo cu mi a trece dilanti tambe den mi discurso.”

 

“Nos ta conecta e mercado laboral y e maneho di labor n’e maneho economico y di educacion. Mi ta kere cu e triangulo ey ta esencial pa nos por tin un economia fructifero y sostenibel. Mi ta kere cu awe esey a bin hopi bon dilanti. Vooral tambe inverti den nos hendenan.

No solamente den e parti fisico, pero tambe e aspecto di Life Long Learning. Esaki ta nifica cu den bo area di trabou bo tin e oportunidad como parti di bo condicionnan laboral pa bo por sigui profesionalisa y profundisa bo mes.”

 

Minister Arends a bisa cu tin varios hende cu hopi experiencia y Gobierno ta buscando moda con certifica e experiencia laboral aki cu den transcurso di añanan por wordo compara cu un educacion vocacional.

“Nos ta bezig cu esey pa duna tambe motivacion n’esnan cu ta traha pa brinda nan asina mas expectativa pa oportunidad, mehoracion profesional y mehoracion humano tambe.”

 

Pa loke t’e avancenan pa starters y young entrepreneurs Minister Arends a splica cu Gobierno a cuminsa agilisa e proceso ey y a identifica 4 top sectornan: Cu ta encera tecnologia limpi, industrianan creativo, logistico y exportacion di conocimento.

“Ora di cuminsa cu negoshinan nobo e sectornan aki ta wordo reconoci y tin un proceso hopi mas liher y hasta menos complica pa establece un negoshi. Nos ta trahando diariamente riba e proceso aki, pa mehor’e y simplifik’e.”

 

Hopi hende a atende Expo Labor loke ta algo masha positivo mes Arends a remarca.

“Aki no tin solamente sector priva presente, pero tambe secor publico. Ora un persona kier drenta e mercado laboral e mester sa kico ta su derechonan y como Gobierno nos tin e tarea pa yuda un hende establece un negoshi, pero tambe con drenta e mercado laboral mas mihor y liher posibel.”

 

 

Top