Minister Richard Arends orguyoso di por a participa den trece alegria den bario di Sero Pita

El a cende e prome luz LED di e bario

 

Despues di 8 aña como Hefe di Gabinete di Minister Mike de Meza, a toca turno pa prome biaha pa Richard Arends, Minister di Asunto Economico, pega e prome luz LED den e bario di Sero Pita. Esaki tabata un honor grandi p’e mandatario, pa mira cu Gobierno ta cumpli cu deseonan di e pueblo.

 

Diahuebs den oranan di anochi a sende e prome punto di iluminacion nobo, den un area di Sero Pita cu pa hopi aña largo a biba den scuridad. Mas punto di iluminacion di caya ta forma parti di e programa Luz den Bario cu Gabinete Mike Eman a cuminsa cune for di 2012.

Sende un punto di luz nobo mas den bario, Minister Arends bisa “ta yenami cu satisfaccion pa mira cu un iniciativa cu Gabinete Mike Eman a tuma algun aña pasa caba ta wordo ehecuta.”

Durante e periodo cu Mike Eman tabata den oposicion, ya caba a cuminsa cana den bario pa habri scucha deseo di habitantenan.

 

Ta basa riba e caminatanan aki cu despues a bira Accion di Bario, como gobernante, a scucha cu un di e preocupacionnan di hopi habitante t’e falta di iluminacion den nan bario of di caminda cerca di nan bario/cas.

Prome Minister Mike Eman den estrecho cooperacion cu Minister di Utilidad e tempo ey, Mike de Meza y Minister di Infrastructura, Benny Sevinger no solamente a crea e programa Luz den Bario, pero tambe a yega n’e decision pa cambia tur e bombiyonan convencional di luz di caya pa tiponan LED.

 

Basa riba e eficiencia di luznan LED, por a logra na crea rond di 3000 punto di iluminacion nobo den barionan rond di Aruba.

Minister Richard Arends a bisa cu iluminacion den bario ta garantisa seguridad cerca e habitantenan y alabes ta permiti cu e habitantenan ta intercambia cu otro.

“Hopi biaha bo ta haya barionan cu ta biba den scuridad, cu habitantenan tin masha poco contact cu otro.

 

E iluminacion lo yuda na fortifica e fibranan cu ta mantene nos sociedad. Pesey mi kier felicita e habitantenan di Sero Pita. Tin hopi trabou ainda pa haci. Esaki ta un stap mas den metanan cu Gobierno tin.”

El a agrega cu e luznan cu ta wordo poni ta LED, cu ta cuadra cu e maneho sostenibel di Gobierno .

 

 

Top