Minister Richard Arends ta felicita ekipo local di transmision

Como titular di Telecomunicacion, Minister Richard Arends a keda sumamente satisfecho cu e trabou cu nos profesionalnan local a desempeña durante e transmision di inauguracion di Plaza Padu.

Un ekipo conforma pa personal di TeleAruba, Setar y Departamento di Prensa di Gobierno, como tambe un elenco di presentado di television cu a duna oido n’e yamada di Minister President Mike Eman a percura pa un transmision di nivel halto.

 

Di e manera aki, esnan cu no por a yega na centro di gobernacion diabierna anochi, tambe por a sigui di serca e momento historico aki como tambe biba cu esnan presente e emocionnan di e espectaculo.

Minister Arends ta kere nos mester sinti orguyo di conta aki na Aruba cu tecniconan capacita tras di camara, mescos cu e talento cu nos ta mira via television e anochi ey como tambe den e contribucionnan di figuranan importante di nos plantanan di television cu a uni forsa pa honra Padu del Caribe, Rufo Wever y Lio Booi.

 

E transmision realisa for di Plaza Padu a cay hopi na agrado di televidentenan, mescos cu esnan den exterior cu por a sigui’e atrabes di internet.

Nos canalnan local di television a traha hunto demostrando un trabou den ekipo di cual, e ciudadano t’esun cu a keda beneficia.

Minister di Telecomunicacion ta duna un palabra di pabien y danki ta bay na tur esnan cu a traha den e esfuerso aki.

Ta consciente cu a hinca dianan di preparacion y hopi ora di trabou, pero na final por mira atras riba calidad di produccion di clase internacional.

 

Leave a Reply

Top