Minister Sevinger: “Realisacion di Watty Vos Blvd ta pone fin na espera di 30 aña y inicio di un era nobo den Infrastructura”

Watty Vos Boulevard, cu ta mucho mas cu un ringweg, ta birando realidad. Fin di e luna aki, segun un anuncio haci dor di Prome Minister Mike Eman y Minister Benny Sevinger, trabou ta bay cuminsa. Esaki ta un di e 4 proyectonan grandi, cu tabata mas di 30 aña den preparacion, cu a wordo realisa door di Gabinete Mike Eman I y II.

 

“Cu e proyecto aki Aruba ta cuminsa y cera un capitulo. Cera e capitulo den un caso di 4 proyecto cu Aruba a bin ta traha riba nan pa e ultimo 30 añanan, di cual e ultimo ta Watty Vis Blvd cu ta den cuminsa”, Minister Benny Sevinger a bisa den conferencia di prensa.

E mandatario a repasa e historia di entre 20 pa 30 aña cu a bin ta papiando riba mudamento di haf, construccion di un hospital nobo, e caminda di 4 via pa San Nicolas y e ringweg (Watty Vos Blvd). Aunke cu e proyecto a cuminsa caba, pa fin di luna tin e ceremonia oficial di inicio di e proyecto cu ta wordo realisa door di e empresa Mota-Engil.

 

Watty Vos Boulevard (WVB) ta un proyecto un poco diferente cu Green Corridor, cu tin hopi zona berde na banda di caminda. WVB ta pasa den diferente bario y e areanan na banda lo wordo desaroya economicamente. A cuminsa cu e proyecto casi 30 aña pasa ora cu a cuminsa cumpra terenonan y awor Gabinete Mike Eman I y II a dicidi di ehecuta esaki y a cuminsa traha riba su realisacion na 2013.

Pa esaki, Minister Sevinger a splica, a busca y haya aprobacion di Parlamento. “Si bo mira entre 2013 y 2017 ta 4 aña a pasa di planeacion y buscamento di financiamento cu finalmente awor e ta den ehecucion”, Minister Sevinger a splica.

 

Ta trata di un proyecto cu no ta encera  solamente un caminda di  4 via cu ta sali for di aeropuerto bay Sasaki, pero cu tambe ta alivia e trafico na Playa. Tambe e ta drecha e caminda di Oranjestad pa Ponton, drecha e actual Sasaki te na Super Food, bay bek na Boulevard bieu for di unda tabata ex Fatum te na Riu. Den esaki ta sigui cu e Linear Park, conectando rib’e parti cu tin caba na Playa. Tur esaki ta consisti di 5 fase. E proyecto aki ta esun mas grandi di Infrastructura, cu no solamente ta cambia infrastructura pero tambe calidad di bida di e habitantenan.

 

Principalmente si mira cuanto hende ta uza e caminda aki den fin di siman pa haci ehercicio.

Tambe tin conexionnan nobo, entre otro rotondo y fly-over, cu lo percura pa trece siguridad y un miho fluho di trafico. E proyecto aki ta inclui un linea pa bicicletanan, cu lo core for di Boulevard, pasa den Watty Vos Boulevard, drenta e caminda di 4 via te na San Nicolas.

E lo percura pa hopi mas movecion di ciclistanan riba e camindanan aki, algo cu Gobierno ta promove pa mantene e ciudadanonan den un estado saludabel.

Leave a Reply

Top