Minister y candidato di partido AVP, dr. Alex Schwengle a celebra su fecha natal tur cu tin

 

Diadomingo atardi y anochi un biaha mas simpatizantenan di Partido di Pueblo Arubano AVP a sa di yega e caya dilanti di residencia di mayornan di dokter Alex Schwengle na Savaneta. Famia, amigo y simpatizantenan di Minister di Salud Publico a bin hunto pa celebra su cumpleaños.

Lider di partido Mike Eman a hiba palabra y a felicita su colega y amigo, pero tambe a resalta e calidadnan di e candidato cu ta bay conoce su di dos campaña electoral.

 

Mike Eman a recorda con 4 aña pasa e tabata para den e mesun cura di cas di mayornan di Minister Schwengle p’e tempo ey introduci’e como candidato riba e lista berde y pidi e confiansa di pueblo di Savaneta y Aruba.

Cuater aña despues: “Nos ta sumamente orguyoso y gradici cu Dios ta dune mas aña di bida pa sirbi e pais aki,” lider di partido a bisa e publico.

Eman a gradici tambe su famia p’e sacrificio cu nan ta haci dia aden y dia afo cu comprension pa e exigencianan pisa di e trabou di dokter Schwengle.

 

Mescos a yama danki na su mayornan p’e bon formacion cu a dun’e como yiu, ciudadano y profesional.

“Ora cu bo ta tuma e decision pa bay atras den entrada p’asina sirbi bo pueblo, esey kier men cu bo curason ta n’e lugar corecto; pesey bo ta AVP, pesey bo ta mi amigo y pesey mi tin confiansa den bo,” Eman a expresa cu hopi entusiasmo.

“Dokter Schwengle a haci un bon trabou y a pone Aruba na prome lugar.”

 

E celebracion a conta cu un publico grandi cu a disfruta di e presentacionnan di e banda musical Perfect Sound y musica di Mariachi. Tambe e a goza di e repertorio bailabel di Tsunami despues di a canta Happy Birthday, corta y come bolo cu tur presente.

 

 

Top