Minister Yrausquin a intercambia riba e relacion entre Union Europeo y e paisnan LGO

DEN HAAG – Minister Plenipotenciario Juan David Yrausquin a atende den nomber di Gobierno di Aruba na Katuaq, Groenland, e debate rib’e relacion entre Union Europeo y e paisnan LGO (Landen en Gebieden Overzee) despues di 2020.

 

E mandatario a presenta e vision di Gobierno di Aruba rib’e asunto aki. E debate a conta tambe cu e presentacion di e Minister pa Industria, Trabou, Comercio, Energia y Asuntonan Exterior di Groenland, Vittus Qujaukitsoq. E acuerdo existente entre Union Europeo y e paisnan LGO lo termina na 2020 y hunto e paisnan mester determina nan relacion cu Union Europeo despues di 2020. Aruba y Groenland pa varios aña caba tin un bon cooperacion rib’e tereno aki.

 

E debate y presentacion aki ta forma parti di e presidencia di Aruba di OCTA.

Anteriormente bou di presidencia di Aruba a tuma luga eventonan similar na Paris, Londres, Den Haag y awor na Nuuk, Groenland. Prome cu e discusion politico representante di Aruba na Union Europeo Cedrick Tilma a tene un introduccion breve riba Aruba y su relacion cu Reino Hulandes y Union Europeo.

 

Experencia y conclusionnan lo keda presenta na e EU-OCTA Forum cual lo tuma luga na luna di februari na Aruba.

Top