Minister Yrausquin a tuma tempo pa sinta y tende nos preocupacionnan

DEN HAAG – Un anochi sumamente informativo, constructivo y ameno. Asina Minister Plenipotenciario Juan David Yrausquin a caulifica su encuentro cu studiantenan na De Goede Herder na Tilburg. E grupo di alrededor di 30 studiante procediente di Den Bosch, Eindhoven, Breda y Tilburg tambe a bisa di a aprecia e oportunidad pa topa y papia cu Minister Yrausquin.

 

Na comienso di e encuentro Minister Yrausquin a bisa di ta contento cu hopi studiante a responde positivo riba su invitacion pa e anochi aki. E mandatario a bisa di a bin na e encuentro aki cu un solo meta y esaki ta pa scucha kico ta biba bou di e studiantenan Arubiano en general, pero e biaha aki particularmente bou di esnan cu ta studia den e region di Brabant.

 

Den su discurso Minister Yrausquin a elabora riba e posibilidadnan di cuminsa cu un propio negoshi, banda di busca un trabao. Pa duna e aspecto aki mas contenido, Gabriel de Mey, cu ta core stage na e departamento di Union Europeo na Cas di Aruba a tene un introduccion rib’e posibilidad di diferente programa cu ta existi cu por duna guia na personanan cu kier cuminsa cu nan mesun negoshi. Ta asina cu Union Europeo ta brinda sosten pa stimula entrepeneurship.

 

Minister Yrausquin a tuma tempo pa a pasa na cada mesa y a sinta papia y scucha loke e studiantenan tin di bisa riba nan bida como studiante. Na final e studiantenan a expresa nan satisfaccion rib’e initiativa di e Minister pa cu e anochi aki y tambe nan a gradici e mandatario pa e invitacion.

Top