Ministerio Publico a baha pisa riba trio – Demanda pisa contra trio envolvi den transaccion di 10 kilo di cocaina y 28 kilo di marihuana

Diahuebs mainta Corte a trata un caso penal contra tres persona, dos Latino y un Arubiano, envolvi den un caso di 10 kilo di cocaina y 28 kilo di marihuana, pa kendenan a exigi castigonan di 6 y 3 aña y 30 luna.

Ta trata di e homber Arubiano M. Tromp, e muhe M. Escobar Romero y e otro homber L. Escudero.  E acusacionnan mas pisa tabata contra e dos ultimonan cu tin di haber cu e contrabanda y negoshi di 10 kilo di cocaina y 28 kilo di marihuana. E hecho aki mester a tuma luga den e periodo di december 2016 pa maart 2017.

E acusado femenino den e caso aki a splica cu el a simplemente coopera cu doño di e droga, un tal Daniel kende tabata su anterior pareha. E homber tabata tin’e menasa. Na momento cu e mester a ricibi algun pakete na su cas, el a laga su representantenan mustra e muhe potret di su mama y yiu homber, kendenan ta na Colombia y cu si e no yuda, lo mata nan. Di su mes, el a bisa, e lo no yuda e homber, kende a abusa di su yiu muhe di 10 aña, inclusive a penetre di patras, y causa cu el a haya un infeccion, a keda cu un trauma y ainda ta bou tratamento di psychiatra.

Aunke cu e tabata sospecha, nunca el a puntra kico e pakinan ta y a laga e hendenan pone nan den un camber cu e no tabata uza. E yabi e tabata duna e hendenan cu Daniel manda pa nan mes regla nan asunto. Tambe a sali na cla cu Daniel mes no por drenta Aruba.

Tabata a base di investigacion haci, a cuminsa vigila dos cas na Dakota, y na tur dos a haya droga, uno mas hopi cu e otro.

E acusadol L. Escudero durante henter tratamento di e caso a bisa cu el a simplemente bini Aruba na juli pa traha, gana placa pa e paga un debe di banco cu e tabatin. El a bende droga den un bar unda cu e tabata traha, pero pa e homber Daniel. E homber aki tabata mande e droga of e mester bay buske na cas di e señora Escobar. E ta nenga cu el a yega di transporta un pakete di un kilo di cocaina, manera Polisnan cu tabata vigile ta bisa. Esaki aparentemente den un rugtas. Pero e rugtas aki, el a splica, e ta bay Pacifico cune y eyden e ta hinca su caminda.

E homber M. Tromp di su banda a wordo acusa di venta di droga, el a cumpra marihuana y a haye cu arma di candela y bala cayente. Su splicacion ta cu el a perde su trabou y tabata haya droga for di diferente persona pa e bende, y asina e ta haya un entrada. Ora cu Polisnan a listra su cas, a haya tanto marihuana como cocaina den cantidad chikito. El a bisa tambe cu e mes ta uza marihuana y su ruman homber cocaina. Pa loke ta e arma di candela, e ta bisa cu su ruman canando bay trabou a haya e arma aki y a trece p’e.

Pa Ministerio Publico tur e acusacionnan a keda legalmente y convincentemente proba pero cada castigo cu el a pidi ta basa riba e rol di nan den e caso aki. Pa M. Tromp, kende e ta considera simplemente un bendedor el a pidi 30 luna di castigo; pa e muhe M. Escobar, kende e ta considera un mula despues di analisa su rol, el a pidi un castigo di 3 aña. Den e caso di L. Escudero, esaki ta diferente. Ta parce cu e acusado aki a bini Aruba specialmente pa atende e asuntonan pa Daniel. E tabata mira si e droga a yega, y haci e tramitenan. E acusado aki, Fiscal a bisa, no ta un simpel bendedor. Su rol tabata mas bien di un intermediario pa cual el a pidi un castigo di 6 aña.

Aki algun siman Corte lo dicta sentencia den e caso aki.

 

Leave a Reply

Top