Ministerio Publico a informa: Un intermediario deteni den investigacion penal di Minister Paul Croes

Ayera a detene e intermediario (tussenpersoon) Juancho Feliciano riba sospecho di actieve ambtelijke omkoping den e investigacion penal “Ibis”, den cual entre otro, Minister Paul Croes ta wordo sospecha di corupcion (ambtelijke corruptie), maluso di funcion y traficacion di hende. Juancho Feliciano ta traha como tramitador di permiso. Di acuerdo cu nos informacion, no ta prome biaha cu mesun persona aki ta haye den problema cu husticia pa mesun delito.

 

Tramitadornan di permiso ta personanan cu tin como profesion of cu tin un compania cu ta intermedia pa stranheronan ora di pidi permisonan di estadia. Nan ta cobra p’esaki.

Juancho Feliciano ta wordo sospecha di (entre otro) a paga Minister Paul Croes, y en cambio e Minister a supuestamente percura pa clientenan di Juancho Feliciano haya ontheffing di e arbeidsmarkttoets, cu ta algo cu ta cay bao DPL.

 

E arbeidsmarkttoets ta prescribi legalmente en principio, prome cu por duna un stranhero un permiso di estadia cu permiso di traha na Aruba, y tin como intencion cu trahadornan local ta wordo selecta pa funcionnan nobo prome cu stranheronan.

Dor di duna un ontheffing, e toets aki ta wordo salta.

Investigacion a mustra cu den e añanan anterior Minister Paul Croes a otorga cientos di ontheffing, segun e comunicado di Ministerio Publico.

 

E team cu ta haci e investigacion “Ibis” (cu ta un combinacion di Recherchenan di Landsrecherche, RST y Cuerpo Policial di Aruba) no a sinta keto desde e huiszoekingnan di 28 maart ultimo.

Den e ultimo periodo hopi testigo y sospechoso a wordo scucha y a wordo haci investigacion di documento y computernan.

E investigacion a hiba n’e momento aki na detencion di Juancho Feliciano, kende lo wordo interoga tocante su envolvimento den e periodo benidero y ta den tur beperking.

 

E investigacion lo continua y den e periodo nos dilanti lo sigui mas detencion, segun Ministerio Publico.

 

 

Top