Ministerio Publico no kier divulga nada mas di investigacion di Minister Paul Croes

Nos lo t’e ultimonan pa cuestiona trabao di husticia y den e caso aki, di e investigacion riba Minister Paul Croes y hendenan rond di dje, pa cual Fiscal Mayor, Erick Olthof a duna di conoce cu e ta ser sospecha di e.o. acepta placa y/of regalo pa fabor haci pa fixmento di permiso y consecuentemente a keda acusa di labamento di placa.

 

Siman pasa, durante e conferencia di prensa, despues di a haci entrada hudicial na 13 localidad, Fiscal Mayor a laga sa tambe, e no ta bay duna mas declaracion, pasobra awor nan ta bay investiga pa busca pruebanan palpable di loke Paul Croes y su hendenan a haci nan mes culpable na dje.

 

Ta pesey, di acuerdo cu varios conocedor di ley, con bin te awe ningun hende no a keda deteni? Lo ta pasobra Ministerio Publico no tin pruebanan palpable pa para riba dje, pa por persigui Minister Paul Croes y/of un di su hendenan?

Ta kico mas tin tras di tur esaki? Pueblo no por keda den un incertidumbre, y ta demanda p’e berdad.

 

Despues cu Fiscal Mayor Erick Olthof a tene un conferencia di prensa, a emiti un solo comunicado di prensa, pa bisa cu den cas di Minister Paul Croes, a haya un persona, kende ta haci trabao domestico, sin tin su papelnan regla.

Pero despues di esaki, no tabatin mas comunicado di prensa. Ayera ta net un siman y pesey a dicidi di aserca vocero di OM, kende a keda di bay averigua un que otro, pero no a bin bek.

Ta kico ta pasando?

Top