Ministerio Publico ta sostene KPA cu maneho di lik-op-stuk durante ultimo simannan di eleccion

Ministerio Publico y Cuerpo Policial di Aruba ta anuncia pa medio di e comunicado di prensa aki, cu lo hiba un maneho di lik-op-stuk (conoci den pueblo como faya-bo-haya) for di awe pa dilanti te na eleccionnan di 22 di september 2017.

 

Durante henter e periodo aki, Polis lo actua cu tolerancia y comprension, pa mas tanto cu ta posibel. Sinembargo, Polis lo actua tambe na un manera decidido.

E enfasis den e trabao di Polis lo ta pa yega na un balanza entre mantene seguridad y orden publico riba caya, y guia y acompaña e actividadnan di campaña di e diferente partidonan mas mihor posibel.

 

Violacionnan di Ley manera violencia, destruccionnan, y buracheria den publico lo no wordo tolera. Ministerio Publico lo reacciona riba esakinan cu su maneho di faya-bo-haya.

Di e forma aki Mnisterio Publico ta duna sosten na Cuerpo Policial di Aruba den su trabao riba caya, cu hopi biaha ta bastante dificil.

 

E maneho di faya-bo-haya ta ensera cu Ministerio Publico ta ofrece un asina yama transaccion na personanan cu a wordo deteni pa Polis relaciona cu delito of infraccionnan relativamente chikito.

Si e persona dicidi pa paga mesora, anto e caso ta keda cla. Si e persona dicidi cu no, anto e lo haya un citacion p’e presenta dilanti Huez na Corte.

Ta importante pa tene cuenta cu e exigencia di castigo na Corte lo sali mucho mas halto cu e multa cu ta haya na Warda di Polis.

Pa juist p’e motibo ey cu Ministerio Publico ta conseha personanan cu a wordo ofreci un transaccion, pa nan paga mesora.

 

Procurador General, mr. Alexander van Dam ta haci un yamada enfatico na tur hende pa sigui trata otro na un manera respetuoso y tolerante durante y despues di e periodo di campaña y eleccion.

Libertad di expresion ta un di e derechonan fundamental di mas importante y un condicion absoluto pa funcionamento di un sociedad democratico.

Cada ciudadano tin derecho pa expresa su opinion, pero haciendo esey mester tambe tene den consideracion e derechonan y e bon nomber y honor di bo conciudadano, y e respet pa seguridad y orden publico na nos pais Aruba.

 

 

Top