Ministernan Eman, Croes y de Meza hunto cu gerencia di CITGO a yama bon bini na contratistanan local Prome 100 trahador ta cuminsa cu proceso di rehabilitacion di Refineria di Aruba

Durante un ceremonia diabierna mainta na San Nicolas, a toca honor na Prome Minister Mike Eman y Ministernan Mike de Meza y Paul Croes pa haci entrega di mas un cantidad grandi di badge n’e prome grupo di trahadornan di contractistanan local cu a cuminsa cu e trabou pa rehabilita e refineria di Aruba.

 

Ta trata di empleadonan di contratistanan grandi local cu hopi experiencia den refineria na Aruba: Oduber Contractors, PWEC, Doushar y Goedecke.

Por a sinti cu tabata reina un alegria grandi bou di e trahadornan cu a ricibi, oficialmente, nan ‘badge’ cu ta permiti nan move den e instalacionnan di e refineria.

“Esaki ta un dia hopi special,” tabata palabranan expresa pa Prome Minister Mike Eman, pero un sentimento expresa tambe pa su coleganan Minister Mike de Meza, Paul Croes y tambe empleadonan di contratistanan presente como tambe representantenan di gerencia di CITGO.

 

E mainta a wordo habri oficialmente dor di Alirio Zambrano, Refinery Project Director di CITGO, kende a bisa cu “ta un gran placer cu nos ta ricibi boso tur awe, den nos cas specialmente den e edificio aki cu t’e prome cu nos a pone den funcion y hopi mas lo sigui, mientras cu e trabounan ta sigui avansa.”

Palabranan di elogio Zambrano tabatin p’e proyecto di pone e refineria den funcion y tabata agradecido cu e mandatarionan a acepta e invitacion pa comparti cu CITGO otro ‘milestone’ den e proyecto.

 

“Ta bay tin mas ‘milestone’ na caminda,” el a enfatisa cu hopi alegria.

E mainta aki a keda presenta tambe top di e team di management di Citgo Aruba; sr. Ray Buckley, Danny Hannigan y Ed Oduber.

“Esaki ta un placer un satisfaccion, pasobra no solamente nos a firma un acuerdo algun luna atras pa reapertura, pero awe nos ta pone cara n’esaki,” Prome Minister Mike Eman a bisa e trahadornan presente.

“Y e t’e momento cu nos a spera riba dje,” y el a enfatisa cu, “e contenido di e papelnan tabata bunita, y nan cantidad grandi, pero en realidad loke ta importante den henter e proceso aki ta cu e cuponan di trabou pa nos hendenan, bienestar pa nos hendenan y un futuro prospero pa Aruba.”

 

Prome Minister Mike Eman a señala cu e tin hopi confiansa den e trabou cu ta bay cuminsa, mirando e companianan envolvi y conoci pa nan experticio den e sector aki.

Sr. Eman a recorda tambe cu den e grupo cu a ricibi nan badge tin hopi cara familiar cu operacion di e refineria.

E mandatario a pidi aplauso p’e companianan envolvi y nan empleadonan y naturalmente a gradici CITGO p’e confiansa demostra den Aruba.

 

Pa finalisa Eman a pidi un “standing ovation” pa Minister ing. Mike de Meza, kende a hinca hopi esfuerso den reapertura di e refineria hunto cu su colega Minister Paul Croes.

“Pa nos esaki ta un momento yena di emocion.”

Awor cu a cuminsa cu rehabilitacion di e facilidad petrolero, por spera cu den poco tempo ta acelera e proceso di tuma mas hende na trabou pa por completa e trabou grandi aki.

 

Top