Mireille Sint Jago di MEP: Brinda mas autonomia financiero pa nos scolnan cu lumpsum

“E diferencia entre scolnan na Aruba ta hopi grandi. Ta conoci cu scolnan publico tin hopi mas placa pa material cu otro scolnan. Ademas tin e situacion cu cada scol lo tin e necesidad pa algun material specifico pa soluciona cierto problemanan den e scol of pa duna profesionalisacion di su team di maestro.
Ultimo aña nos por a wak con Minister di Enseñansa a haci mal uzo di su poder y a aloca miyones, pa e scol priva di su yiunan. Pa preveni cu cualkier scol falta placa pa material, lo mester introduci e lumpsum pa cada scol irespecto su denominacion. Tur scol mester haya e oportunidad pa cumpra e material cu ta necesario pa e por brinda su alumnonan e mihor educacion posibel”, segun Sint Jago.

“Dor cu e cantidad y tipo di problemanan social y educacional na cada scol ta varia, maestronan na Aruba ta sinti cu nan mannan ta mara. Aunke cu maestronan semper ta disponibel pa yuda cualkier mucha den necesidad, specialmente ora nan tende cu ‘No Tin Placa’, e hecho cu e scol priva ISA si a ricibi miyones di Minister Hooijboer a pone e cuerpo di maestronan rabia
Na prome instancia e proyecto di GED a wordo introduci como un proyecto pa dropouts. Awor e storia a cambia y e ta un alternativa pa studiantenen di nivel di Havo?
E dos miyon por a wordo uza pa cuminsa traha un Havo Scol na Noord, pa percura cu tur Mavo scol na San Nicolas tin WiFi, pa inverti den klasnan mas chikito na Playa, of pa un sector nobo na EPI of IPA pa p. e. ‘onderwijsassistenten’”, Sint Jago ta splica.

“Pues lo ta na su lugar si tur e scolnan na Aruba mes ta ricibi un lumpsum pa material irrespecto si ta un scol publico of no. Asina nos por preveni cu un Minister di Enseñansa por hunga politica cu placa di pueblo, manera Minister Michelle Hooyboer-Winklaar a haci. Despues di e Insure2 Study-Gate, SCHOOLGELD-Gate, tur e casonan den corte contra maestronan y directivanan di scol, awor nos tin e GED@ISA-Gate.
Minister Hooyboer a abusa di su poder como Minister di Enseñansa dor di aloca miyones di placa di pueblo pa International School Aruba (ISA). E scol PRIVA caminda su yiunan mes y tambe di mas coleganan di su partido berde ta bay. Ya caba nos a wak cu e no a haci net nada pa mehora e calidad di educacion na Aruba, su retiro di politica ta na su lugar”, Sint Jago ta continua bisando.

“Pa preveni situacionnan asina, caminda un Minister di Enseñansa ta haci mal uzo di su poder y ta maneha placa di pueblo manera e kier y no manera e mester haci, nos lo mester decentralisa financiamento di material y profesionalisacion di nos maestronan.
En bes di traha cu un sistema di declaracion, mester duna cada scol un lumpsum pa material y profesionalisacion na comienso di e aña escolar cu ta bin directamente di Gobierno y cu ta controla durante e aña si ta cumpli. Asina scolnan mes por wak pa nan bin cu un programa mas inovativo, of si mester di mas material pa gym, si por combati cierto problemanan social, organisa charla, curso, huiswerkbegeleiding etc.”, Sint Jago a mustra.

“Naturalmente directivanan di scol ta keda encarga cu e aspecto contract y pago di e maestro. Asina nos por logra mas autonomia pa cada scol y ayudo di calidad pa cada mucha.
Pa idealismo vence materialismo ora riba e bunita fecha di 22 di september, pueblo di Aruba, masalmente ta bay vota. Pa mi, esey ta primordial!”, Sint Jago a duna di conoce.

Top