Mireille Sint Jago di MEP: MEP lo percura pa un miho cuido pa nos grandinan

Durante campaña cas pa cas, nos a encontra varios hende cu ta traha den e area di cuido di nos grandinan of ta cuida un miembro di famia na cas.

Siman pasa nos a wordo invita dor di sr. Carlos Bennett pa bishita su mama señora Juliana Cranston, cu lo cumpli 97 aña fin di e luna aki, na San Nicolas. E meneer aki ta un pan di Dios!

E ta cuida su mama, cu aunke e ta den un rolstoel, e por cana si, pero no mucho largo.

Locual Mr. Bennett a ripara, ta cu e mesun marca di hoestdrank cu tabata gratis, awor no ta wordo paga dor di AZV mas. Awor e mester paga 20 florin!, Sint Jago ta splica.

 

Na un otro famia nos a haya e reclamo cu e onderleggersnan ta caro. Banda di Congoweg un miembro di un otro famia a splica cu ta falta hopi material den e casnan di anciano.

Ta falta p. e. camanan drechi, pa haci e trabou di hisa e grandinan mas miho.

Ta falta cupo pa yuda cu e cuido di nos grandinan. Tambe falta medio di transportacion pa por sali cu nos grandinan.
Ta di lamenta ora nos realisa cuanto nos grandinan y nan famianan ta sufri bou di e maneho di klinker y asfalt e ultimo 8 añanan. Caminda no tin ni mil florin pa drecha un autobus pa nos grandinan por pasa un dia agradabel, pero ta malgasta miyones grandemente na cos di locura manera cabay blauw, Sint Jago ta expresa.

Ora MEP drenta Gobierno bek, nos lo haci un investigacion pa haya sa kico tur ta e material cu ta falta. MEP lo percura pa mehora e cuido di nos grandinan, sea e ta keda na un cas di anciano of cerca su famia. Esnan cu ta cuida nos grandinan merece pa e condicionnan di nan trabou mehora, pa e prijs y calidad di material ta ser controla y cu nos grandinan por sigui gosa di nan bida.

 

Dor di e bishitanan cas pa cas, nos ta haya sa e situacion real na Aruba. Nos tin hopi aprecio pa tur esnan cu ta cuida nos grandinan dia den dia afo. Sigui cu e tremendo trabou aki.

Hunto nos por logra e cambionan! Falta 5 luna pa e rumbo di pais Aruba cambia pa uno mas miho.

 

Un palabra di danki ta bay na tur e famianan cu a habri nan hogar pa nos por a pasa y specificamente na famia Bennett-Cranston cu a sigura nos cu e ta un honor pa nan pa demostra nan sosten na MEP te den corant.

Mr. Bennett ta sostene mi persona como candidata y nos ta bay Hunto p’e Cambio y Sin Miedo!, ta locual Mireille Sint Jago di MEP a duna di conoce.

 

Top