Mireille Sint Jago di MEP: Michelle Hooyboer-Winklaar ta gasta mas y mas na casonan den corte contra maestronan

“Michelle Hooyboer-Winklaar mester ta contra maestronan di Aruba. Nunca prome Aruba a conoce un Minister di Enseñansa cu tanto casonan den corte contra maestronan y contra directivanan di scol. Nos tur ta corda ainda e caso contra juffrouw Suki, e caso contra managernan di EPI, e casonan contra SMOA, e asunto di e directora di SKOA cu a wordo suspendi y e caso di schoolgeld.

Den tur e casonan aki, Minister Hooyboer-Winklaar a demostra cu e no kier busca solucion, pero kier haya su kier y hiba tur maestro y directiva di scol dilanti mesa berde. Minister Michelle Hooyboer-Winklaar por subi avion cu un one-way ticket pa su pais stima: Canada”, Sint Jago a splica.

“Imagina bo mes si enseñansa di Aruba por a haya e 2 miyon di fondo publico cu Minister di Enseñansa a regala ISA, un scol priva! Nos scolnan por a inverti den material, infrastructura pa wifi, un mediatheek, tablets y bukinan nobo na nos scolnan. Pero tambe pa crea un fondo social pa tur e victimanan di e maneho di AVP.

Michelle Hooyboer-Winklaar ta gasta asina hopi placa di pueblo cu e casonan den corte, cu si e ta yega mey miyon, un berdadero Minister di Enseñansa lo por a inova tur scol na Aruba cu un infrastructura pa wireless internet y tablets of un mediatheek cu computer y bukinan nobo en bes di bukinan segundo mano”, Sint Jago a continua bisando.

“Partido MEP ta cla pa ‘ruim op de boel’ un biaha mas. Un partido cu un trayectoria impresionante, pero den un bachi nobo cu un ekipo cu ta cla pa hiba Aruba den un miho direccion. Nos lo pone ordo y un biaha mas realisa berdadero inovacion den educacion.

Noord lo haya su MAVO/HAVO. Lo crea fondo pa proyectonan inovativo!

Den Reino Hulandes e ta masha normal cu tin HAVO cu ta ofrece Twee Talig Onderwijs (TTO) of cu un scol tin docentnan cu ta specialisa como Maestro pa muchanan cu tin Hulandes como idioma stranhero: (Nederlands als Vreemde Taal, NVT). Ta p’esey e ta importante pa pueblo percura pa nan ta bon informa prome cu nan vota. Pa mi, asina so durante e eleccion aki, Idealismo lo vence Materialismo!”, tabata palabranan di Mireille Sint Jago.

Top