Mireille Sint Jago di MEP: Pa renoba enseñansa na Aruba, ta mescos cu ora bo kier renoba un cas

“Awe mi kier pa bo puntra bo mes PAKICO ainda nos ta uza un sistema di educacion cu NO ta funciona. Si, nos sistema di educacion NO ta funciona! Con mi por sa?

Pasobra si e tabata funciona, no lo tin tanto hende cu ta keha. No lo tin resultadonan abou. No lo tin tanto mucha cu ta kere cu nan no por miho.

E situacion awor aki ta cu mayornan ta keha cu e maestronan NO ta motiva. (Hopi biaha e mayornan ta keha den silencio, pasobra nan tin miedo cu nan yiu lo sali perhudica).

Maestronan ta keha cu e mayornan kier pone tur responsabilidad den man di scol of e maestro. Tambe nos tin e Directivanan di e scolnan. Nan ta culpa Gobierno y Gobierno ta traha bunita plannan di maneho, pero nan no ta facilita e directivanan cu e fondonan”, segun Mireille Sint Jago.

 

“Mientras tanto, nos muchanan ta sali perhudica. Nan ta kere cu nos sa, pero e berdad ta cu NINGUN di nos sa con grandi e problema di nos enseñansa ta. Nos tin un situacion UNICO na Aruba cu mester di un solucion UNICO. Nos NO por copy paste un plan di maneho di un otro pais pa soluciona e problemanan den educacion aki na Aruba.

Pa nos renoba Enseñansa na Aruba, ta mescos cu ora bo kier renoba un cas. Prome bo mester bay wak KICO tur mester wordo renoba cu ta causa daño of un problema. Mester haci un analisis. Nos lo mester haci un investigacion profundo. Pero den bo calculacion di trabou y material pa cu e renobacion, lo bo mester tene cuenta cu problemanan cu bo no por wak ainda te ora cu bo “kita e dak”, Sint Jago ta splica.

 

“Sea bo ta haya cu nos sistema di educacion ta sirbi si of no, cada tanto aña lo mester renoba un scol mescos cu un cas. Specialmente si bo no a manten’e bon, cual ta e caso aki na Aruba.

NOS lo mester renoba nos sistema di enseñansa pa e sirbi e tipo di mucha y studiante cu nos tin awendia: Un generacion cu no conoce un mundo sin internet, sin computer, smart phones y computer games. Ta p’esey nos mester RENOBA prome cu nos por INOVA nos sistema di enseñansa. NOS mester CONSERVA locual ta BON y CAMBIA locual NO ta funciona”, Sint Jago ta amplia.

 

“En corto, nos no por bisa cu nos ta EDUCANDO nos muchanan, si nan no ta COMPRONDE! Ademas, nos mester cumpli cu e reglanan di UNESCO y brinda TUR mucha educacion basico den su lenga materno. Nos mester percura pa nos muchanan conoce hopi mas exito cu fayo den nan educacion. Asina SO, nan lo por desaroya nan mes na un manera cu nan ta mas independiente y cu un auto-estima mas halto. E ta NOS responsabilidad pa nos hobennan ta EXITOSO. Si NAN faya, ta pasobra NOS como politiconan, directivanan di scol, maestronan y mayornan a faya nan”, el a enfatisa.

 

“Nos muchanan y studiantenan merece un sistema di enseñansa cu ta yuda nan desaroya nan  talentonan. Ora cu NOS como politiconan a crea e condicionnan pa e miho sistema di enseñansa. Ora cu NOS a caba di renoba e ‘cas di educacion’ cu nos ta yama ‘scol’ dor di brinda tur mucha educacion den nan lenga materno, ora cu NOS como mayornan a cumpli cu nos responsabilidadnan, ora cu NOS como maestronan tin tur e hermentnan necesario pa por educa e alumno. Ora TUR TUR cos ta ‘in place’ y ainda nos muchanan ta faya, por ta e ora ey nos por bisa cu nan fayo ta NAN ‘fout’.

Pues, ban traha hunto pa conscientisa cu nos sistema di educacion mester di un profundo RENOBACION. Asina SO nos lo por logra un cambio pa hopi y hopi mas miho. No mester tin miedo di e cambio aki. Hunto NOS por logra sigur”, Sint Jago a conclui.

Top