Mireille Sint Jago (MEP): Enseñansa na Aruba lo haya su overhaul necesario

Ta ora pa nos admiti cu nos scolnan mester di un overhaul completo y hopi necesario. Por ehempel, nos scolnan basico mester di hopi mas material, pero tambe di ayudo den e forma di Klassenassistent y Leesmoeders (m/f) y digitalisacion.

Asina nan por logra educa y prepara nos muchanan pa scol secundario hopi mas mihor.

Esaki ta necesario pa nos hobennan keda interesa den nan educacion y haya mas motivacion pa nan tuma responsabilidad pa nan mesun future, segun e miembro di MEP, Mireille Sint Jago.

Aworaki tin un porcentahe grandi di mucha y studiante cu no ta logra pa nan por ta exitoso den nos sistema di enseñansa. Esey mester cambia.

Pa logra e cambio, nos lo mester laga cierto custumber bay pa traha lugar pa ideanan inovativo. Esey kiermen cu nos mester tira tur cos afo?

No… no… absolutamente cu NO!

Nos como maestronan lo mester haya chens pa wak kico tur ta pasando den enseñansa rond mundo.

N’e mesun momento lo mester inventarisa e habilidad, talentonan y vision di nos mes como maestronan y combina esaki cu e deseonan di nos alumnonan. Asina nos lo por yega na un vision fuerte pa cu nos educacion, segun Mireille Sint Jago.

Algun ehempel di desaroyonan den nos mesun Reino cu te ainda no a yega Aruba na un manera integral:
• Dalton Onderwijs: Caminda muchanan ta siña pa traha cu nan propio planning y leerdoelen pa un periodo di 6 siman.

  • Technasium: Studiantenan ta haya un tarea/problema pa soluciona pa un compania.
    • Twee Talig Onderwijs (TTO): Studiantenan ta scoge algun materia den un otro idioma di instruccion cu Hulandes.
    • Leren voor Duurzaam Onderwijs (LvDO): Na un manera integral ta educa e studiantenan pa pensa riba solucionnan pa problemanan riba e tereno di Medio Ambiente, Asuntonan Social, Salud (publico), Energia y Economia.
    • Docenten Ontwikkel Team (DOT): Un proyecto cu ta brinda e oportunidad na docentenan di diferente scol pa delibera riba topiconan y trece solucionnan cu por wordo implementa na tur scol. Tambe e ta encera traha material nobo pa nos scolnan.

    E situacion aworaki ta cu cada scol y cada maestro ta haci tur cos cu ta aki riba den un forma of otro y mayoria di nan no ta wordo facilita cu por ehempel un taakuur.

Ademas, e cantidad di oranan (lesuur) cu maestronan den scol secundario ta traha combina cu e situacion cu nan ta traha cu alumnonan cu no a siña di ta mas independiente pa via di e discrepancia entre e idioma di instruccion y nan lenga materno, ta haci e trabou di un maestro hopi mas pisa.

 

Djis pasobra esaki a bira un custumber, no ta un argumento pa esaki no cambia. Mireille Sint Jago ta convenci cu e ta baha e calidad di nos educacion. Nos tur mester ta hopi agradecido pa tur e trabou cu nos maestronan na tur scol ta brinda nos muchanan tur dia.

Sinembargo, na fin di dia nos tin cu puntra nos mes si nos sistema di educacion realmente ta prepara nos muchanan pa futuro.

Tin un grupo cu ta creciendo cu ta realisa cu e ta hopi necesario pa nos cuminsa prepara e futuro generacion pa nan por aporta na nos comunidad prome, dor di brinda educacion den nan lenga materno.

 

E miembro di MEP sa sigur cu esey lo trece un alivio grandi pa studiante, maestro y mayornan cu tambe ta lucha pa nan yiunan haya nan educacion.

TTO y Dalton Onderwijs lo ta algun programa inovativo cu por trece un cambio profundo. Pero tambe un DOT team lo yuda pa nos haya solucionnan specificamente p’e situacion di nos educacion aki na Aruba.

Ta necesario pa nos envolve nos maestronan mas hopi posibel den e maneho di nos enseñansa na Aruba. Asina so nos por crea un educacion cu ta crea studiantenan fuerte.

Un dicho hopi conoci riba e topico aki ta: “If you are not willing to learn, no one can help you, if you are determined to learn, no one can stop you!”

Ban laga idealismo vence materialismo, dia 22 di september, ora nos bay vota. Pa Mireille Sint Jago, esey ta primordial. Ban Hunto p’e Cambio!

Top