Monica Pimentel su coach Olimpico Phillipe Pinerd a bin Aruba pa dune ultimo detayenan prome cu Rio

Diasabra ultimo Phillipe Pinerd, coach Olimpico di Monica Pimentel a yega Aruba cu e meta pa train su atleta cu el a kere aden for di aña 2011 y cu awor a clasifica pa Rio 2016.

Phillipe Pinerd a baha for di avion y a sa di yega cerca Monica Pimentel p’asina cuminsa cu training y instrui Monica Pimentel tocante di e ultimo desaroyo y cambionan cu tin den Taekwondo pa Rio 2016.

Mirando cu pa Rio 2016 World Taekwondo Federation a bin ta haciendo hopi cambio den e sistema electronico di Taekwondo, pasobra cu hopi atleta a cuminsa inventa tur sorto di scop straño p’asina logra score punto, manera e monkey kick cu awendia no mag di wordo usa den Taekwondo mas pa score.

Na Rio ta bay haci uso di e sistema DAEDO y e inventor Jin Song ta bon conoci aki na Aruba y e mester a haci varios cambio y asina a bin cu un software hopi mas avansa pa Rio.

Phillipe Pinerd ta sigui tur desaroyo di Taekwondo mundialmente di serca y a bin Aruba bon prepara pa Monica Pimentel cu ta saliendo pa Rio den e dianan aki nos dilanti.

Asina ta sigura cu su atleta Monica Pimentel ta bon na conocimento di tur e cambionan y bon prepara.

 

Phillipe Pinerd ta sigur cu Monica Pimentel lo trece un medaya Aruba. Phillipe Pinerd a bisa esaki cu hopi confiansa.

Phillipe Pinerd a bisa tambe cu ta un caminda largo nan a core p’asina awe por wak atras riba un bon trabou cu a wordo haci cu Monica Pimentel.

Dr. Guaicaipuro Jimenez, Presidente di Aruba Taekwondo Bond “ARTBO” a gradici sr. Phillipe Pinerd pa tur su esfuerso cu el a haci pa Monica Pimentel y pais Aruba y a duna Phillipe Pinerd un plakaat den nomber di ARTBO.

Top