Monica Sanchez cu e titulo maximo di Bikini Fitness conkista den Ben Weider Caribbean Classic Aruba 2017

E titulo maximo di Bikini Fitness 2017 conkista p’e atleta di bodybuilding/fitness Monica Sanchez den e competencia Ben Weider Caribbean Classic 2017 tabata uno grandi y historico p’e deporte di bodybuilding y fitness na Aruba.

E logro aki ta un di esnan mas grandi conkista pa un atleta di Aruba den un competencia internacionalmente renombra manera e Ben Weider, e prome profesional den Bikini Fitness.

 

E magnitud di e competencia sin duda tabata uno di nivel halto huzga pa Hueznan di taya mundial cu a bin di tur parti mundo. Por a sinti un alegria enorme ora a anuncia Monica Sanchez como a ganadora maximo, e publico di Aruba presente den e ballroom di Aruba Marriott Hotel a celebra esaki cu grito y aplauso.

E lagrimanan pa cu e conkista aki tabata notable serca tur esnan cu e biba e esfuerso di Monica di serca.

 

E atleta Arubano mes tabata super emociona, e sentimento di gana un competencia manera e Ben Weider ta super grandi cu ta pone uno sinti’e orguyoso. Den su propio palabranan Monica a bisa di ta contento cu e titulo y ta spera cu esaki lo por habri porta pa nos atletanan di Aruba internacionalmente, sin laga afor e inspiracion cu e lo kier ta pa nos hoben atletanan cu tambe ta practica e deporte aki, e lo kier yuda nan yega mas leu cu ta posibel.

 

Den pasado ya caba Monica a representa Aruba na varios ocasion. Riba e bunita y dia historico aki el a ricibi su premio maximo di e Ben Weider for di man di sra. Nicole Hoevertsz, miembro di Comite Olimpico Arubano y Comite Olimpico Internacional den presencia di nada menos cu e Presidente di e Federacion Internacional di Bodybuilding(IFBB), dr. Rafael Santonja y Presidente di Aruba Bodybuilding, sr. Giovanni Arendsz.

Lotto kier a felicita e atleta Monica Sanchez, su famia, su coach, su gym esta Hardcore Gym y Aruba Bodybuilding Association pa cu e tremendo logro aki.

 

Top