Montaña a ricibi Prome Minister Eman cu brasa habri

Cu un alegria grandi e bario di personanan humilde, Montaña, a ricibi Prome Minister Mike Eman diahuebs durante su Accion di Bario. Tur diahuebs Prome Minister Eman ta cana den un bario, cu ta bay haya puntonan nobo di iluminacion.

 

No solamente e ta informa nan di e ceremonia cu lo tuma luga semper riba un diahuebs anochi, pero ta probecha pa combersa cu e ciudadanonan manera el a bin ta haci e ultimo 8 añanan.

Pa e mandatario, manera el a bisa, esaki ta un forma pa keda den contacto cu e ciudadanonan, pa ta na altura cual ta nan dolornan y con Gobierno por drecha cierto situacion na bienestar di e pueblo en general.

 

Den Montaña cada cas cu Prome Minister Eman a yega e tabata wordo ricibi cu un sonrisa, un brasa, y cu invitacion pa drenta paden pa sinta combersa un rato. Durante e bishita di 4 ora cu a yega te na Sabana Liber, a scucha un biaha mas riba peticion pa haya iluminacion.

“Luz den bario ta un deseo simpel di mayoria di ciudadanonan. Luz ta duna nan siguridad.

P’esey pa Gobierno e programa Luz den Bario t’asina importante”, e mandatario a expresa.

 

Den e bishita na Montaña Prome Minister Eman a scucha den priva varios ciudadano cu a confronta un of otro problema, a mira con un ama di cas ta practica sostenibilidad den su hofi, un sra. cu pa 43 aña caba a fabrica un poste di luz dilanti di cas, mientras cu otronan tabata expresa nan preocupacion cu nan Prome Minister ta traha demasiado duro.

Pero nan peticion mas grandi pa haya mas iluminacion, ta algo cu e mandatario a sigura nan “lo bini sigur”.

 

Na final di e bishita un ciudadano a sorprende Prome Minister Eman cu un baki di drikidek cu e mandatario a comparti cu tur esnan cu a compañ’e den e Accion di Bario y bisiñanan cu a bini hunto.

 

Top