Morto inespera di un hoben conoci den comunidad a bolbe lanta polemica encuanto cuido medico na Aruba

Wouter de Ruiter, un hoben di 27 aña, conocido activista di partido AVP, conoci den su hendenan como un persona di curason noble, a fayece inesperadamente dialuna anochi.

Causa di su morto tabata un tumor celebral cu a bin descubri despues cu el a wordo declara clinicamente morto.

 

Segun fuentenan sercano, Wouter lo tabata kehando di dolornan di cabes bastante fuerte pa algun tempo caba. El a yega di acudi na servicio di emergencia di hospital na diferente ocasion pa cu su dolencia, pero nunca a conduci un test y a simplemente recet’e Paracetamol.

 

Diadomingo anochi, ‘Woutertje’, manera cu su hendenan di mas serca tabata yam’e cariñosamente, a sinti su curpa basta malo y mester a bay servicio di emergencia un bes mas.

Segun informacion, el a yega na tino ainda pero tabata sinti basta debil y di un momento pa otro a drenta den coma.

Algun ora despues, a logra hasi test y a bin descubri cu Wouter tabatin un tumor di un grandura di 27 centimeter den cabes, cual a ocaciona su morto celebral y eventualmente su bida.

 

Dialuna anochi a drenta e noticia cu Wouter Rufino De Ruiter, a fayece pa 9:10 pm.

E noticia aki a causa un avalancha di reaccion den medionan social, unda cu den su gran mayoria por mira e tristesa y sentimento di impotencia di nos comunidad, vociferando cu e morto di Wouter ta producto di negligencia medico.

 

Den e reunion cu tabatin den Parlamento tocante e construccion y remodelacion di hospital, tambe a hasi mencion di e caso lamentabel di Wouter.

Den opinion di hopi, e falta di aparatonan medico importante na hospital, ta loke ta causando hopi morto inespera y te hasta innecesario na Aruba.

 

Nos mas profundo palabra di convivencia pa cu e famianan, amigonan y demas conocir di e fayecido.

Cu Woutertje sosega na pas….

 

 

Leave a Reply

Top