MPB ta consehá pa bay vota pa eleccion di Tweede Kamer

KRALENDIJK – Aki 1 dia pa ta exacto diarazon 15 di maart ta bay tin eleccion pa Tweede Kamer.

MPB ta consehá tur hende cu tin derecho di voto pa haci uso di nan voto. MPB ta consehá pa vota pa partidonan cu semper a demostrá di tin un curazon calor pa Bonaire manera partidonan D66 y CDA, no obstante cu MPB no ta di acuerdo cu tur punto di salida di e dos partidonan aki.

 

For di 10-10-10 Bonaire ta parti Hulanda y “Tweede Kamer” t’e Parlamento pa Hulanda, pero pa Bonaire tambe como Entidad Público di Hulanda. P’e motibo aki ta esencial pa Bonaire tin bos den “Tweede Kamer” caminda nos por influenciá decisionnan na fabor di Bonaire y ta p’esey ta hopi importante pa nos bay vota diarazon awor.

 

DICON VOTA PA D66
Riba lista di D66 tin e lider #1 Alexander Pechtold kende ta ex Minister di Asuntonan di Reino. Tambe tin e candidato #18 Antje Diertens kende a bishitá Bonaire 2 siman pasá pa presentá su mes na pueblo Boneriano.

Antje Diertens di D66 ta bisa cu Hulanda tin su historia cu e islanan di Caribe Hulandes y t’e historia ey ta mara nos hunto.

 

Hopi biaha nos ta pone mucho atencion na kico ta dividí nos na lugar di wak kico ta uni nos. E tempo pa mustra dede riba otro mester ta pasado e ora a yega pa hunto nos traha riba nos futuro.

Antje Diertens hunto cu D66 ta comprometé nan mes pa traha pa un desaroyo Socio-Económico di Bonaire cu inversion den Enseñansa, Salubridad, energia duradero y cu hopi atencion pa mantencion di nos cayanan, ta palabranan di Antje Diertens.

 

DICON VOTA PA CDA
CDA ta bisa lo siguiente: Cu ta bisto cu ta tempo pa un otro Gobièrno na Den Haag. Un Gobièrno cu realmente kier scucha e islanan BES.

Tin palabracionnan cu a haci e tempo aya cu Secretario di Estado Bijleveld di CDA, cu Gobièrnonan cu a sigui no a ehecutá.

Observacionnan di ex Minister Spies di CDA den e rapòrt di evaluacion te ainda no a haci totalmente nada cuné caminda cu Hulanda a palabrá cu Bonaire cu e recomendacionnan di e rapòrt di evaluacion Spies lo wòrdo respetá y concretisá por medio di un plan di ehecucion cu Gabinete Hulandes lo mester tuma un pocision riba dje.

 

BAY VOTA Y DUNA BONAIRE VOZ PA NEGOCIA CU HULANDA
MPB ta di opinion cu Bonaire den algo mas cu 6 aña como parti di Hulanda a mira mehoracion grandi riba tereno di e.o. Enseñansa, Salubridad y Cuido pa Grandinan.

Riba diferente área Bonaire a bay hopi dilanti den 6 aña si nos compará esaki cu 60 aña Antia.

 

Pa a logra esaki Hulanda a invertí hopi den Bonaire. Cifranan ta indicá cu Hulanda a invertí minimalmente dòbel mas tanto cu Bonaire mes ta producí na entrada.

Esaki t’e beneficio ora nos ta parti di Hulanda. Ta p’esey MPB ta consehá pueblo di Bonaire pa haci uso di nan voto y bay vota diarazon aki p’asina nos tin mas bos den “Tweede Kamer” por medio di un candidato òf un partido cu nos ta sostené aki na Bonaire y asina nos por negociá recomendacionnan di rapòrt di evaluacion Spies cu énfasis riba un mihor forsa di compra cu ta nificá e.o. un mihor pensioen y un mihor sueldo mínimo.

 

Otro puntonan clave cu rapòrt di evaluacion Spies ta pone dede riba dje ta un mihor seguridad y drechamento di nos cayanan cu ta den hopi mal estado.

 

 

 

Top