MPB ta contento cu resultado di eleccion pa Tweede Kamer

KRALENDIJK – MPB ta felicita partido D66 cu a gana eleccion pa Tweede Kamer na Boneiro. MPB ta contento cu e resultado di eleccion pa Tweede Kamer mirando cu ta bay tin un cambio di Gobierno Hulandes cu lo bay ta mas na fabor di Boneiro cu participacion di partidonan manera D66 y CDA cu tin curason calor pa Boneiro.

MPB ta felicita partido VVD cu a gana eleccion pa Tweede Kamer na Hulanda y hunto cu D66 y CDA casi sigur lo forma e base pa un coalision nobo hunto cu un di 4 partido cu por ta GroenLinks of Christen Unie.

 

INCLUI PUNTONAN DI PRIORIDAD DEN PROGRAMA DI GOBERNACION

MPB ta sumamente contento cu partidonan cu tin curason calor pa Boneiro manera D66 y CDA pero tambe GroenLinks a saca respectivamente 19, 19 y 14 asiento.

Boneiro a conoce 4 aña di gobernacion di Hulanda caminda tin cambionan a tuma luga na Boneiro manera e. o. riba tereno di salubridad, enseñansa y cuido pa grandinan.

 

Di otro banda tin puntonan clave, manera e raport di evaluacion Spies ta menciona, cu tambe mester di atencion rapido. P. e. nos forsa di compra general, pero particularmente e pensioen, e sueldo minimo y miho facilidad pa mamanan soltero.

Raport Spies ta papia palabra cla tambe cu mester mehora nos siguridad, mester di mas y miho cas pa pueblo y no papia mes di nos careteranan cu ta den hopi mal estado.

MPB hunto cu demas miembronan di coalision incluyendo oposicion tambe lo pone puntonan di prioridad y trece esakinan na conocemento di e partidonan Hulandes cu lo bay forma parti di un coalision nobo, p’asina nan inclui Boneiro su puntonan di prioridad den e Programa di Gobernacion di e Gobierno nobo di Hulanda.

 

KITA RETRASO SOCIAL

MPB ta felicita pueblo Boneriano cu a sa di bay vota ayera pa eleccion di Tweede Kamer. Gobierno di Boneiro pero tambe esun di Hulanda tin un tarea hopi importante pa respeta y concretisa e recomendacionnan describi den raport di evaluacion Spies.

MPB ta kere cu e animo pa vota pa eleccion di Tweede Kamer lo ta mucho mas halto aki 4 aña cu si den e proximo 4 aña di e gobernacion nobo di Hulanda aki nos logra kita retrasonan social cu tin e pueblo Boneriano basta molestia.

Pueblo Boneriano sigur ta agredecido y parcialmente contento cu loke Boneiru a logra den algo mas cu 6 aña siendo parti di Hulanda pero den e mesun rosea pueblo Boneriano ta exigi pa su situacion social mehora mescos cu Hulanda a mehora e. o. Servicio di Impuesto, Servicio di Duana y Servicio di Bombero.

 

ORA A YEGA PA NEGOCIA CU HULANDA

Cu un Gobierno di Hulanda nobo na caminda cu participacion di partidonan cu tin un curason calor pa Boneiro MPB ta kere cu e ora a yega cu Gobierno di Boneiro mester exigi e compromiso di e Gobierno Hulandes nobo pa habri portanan di negosacion nobo pa durante e 4 añanan binidero di gobernacion nos por logra ehecuta e puntonan di recomendacion di raport Spies pero particularmente mehora nos pensioen, nos sueldo minimo, nos casnan di pueblo y nos cayanan.

Top