Mr. Gerlien Croes a sende prome luz LED den e bario

E programa Luz den Bario a yega Sero Preto diahuebs anochi ora cu e prome punto di iluminacion nobo instala dor di N.V. Elmar a wordo sendi dor di e hoben profesional Gerlien Croes, hurista y consehero di maneho na Oficina di Relacionnan Europeo y Reino, y cu a lanta na Paradera, den e becindario.

Bisiñanan di e percela Sero Preto 17-A y habitantenan di e bario a bin diahuebs anochi hunto na cas di Maria van Broekhoven, unda cu den presencia di Prome Minister Mike Eman e luz a wordo sendi.

 

“Awe un otro bario di Aruba ta haya luz. E bario aki tabatin hopi aña den scuridad y unda cu nos a cana awe durante dia, nan a bisa nos cu nan ta contento cu e bario ta bay haya su luz,” Prome Minister Mike Eman a bisa despues cu mr. Gerlien Croes a sende e prome luz.

E mandatario a expresa di ta sinti un satisfaccion grandi cu un biaha mas Gobierno por a cumpli cu e Programa di Luz den Bario pa trece claridad y seguridad p’e famianan cu ta biba den barionan cu no tabatin luz.

“Nos lo sigui haci e trabou aki pa mehora calidad di bida den cada bario di Aruba,” e mandatario a agrega.

 

Mr. Gerlien Croes, kende ayera anochi a informa cu el a tuma e decision pa bay den servicio publico, pa sirbi pueblo di Aruba, a bisa cu tabata un honor p’e por a sende e prome luz den Sero Preto.

“Mi ta kere cu esaki ta djis e comienso di hopi mas proyecto cu ta bay tin pa Aruba. Pesey nos ta aki, pa sigui sirbi nos pueblo.”

Bisiñanan hunto a keda celebra e dia grandi aki pa nan bario despues di e ceremonia di e prome luz LED.

 

Dr. van Broekhoven ta biba den e bario di Seroe Preto for di 1992. “Mi ta hopi contento mes cu awe e prome luz a wordo sendi y e resto di bario ta haya den e dianan cu ta bin.

Sero Preto ta un di e barionan hopi scur y mi ta kere cu henter bario ta contento cu luz a yega. E iluminacion ta contribui na seguridad,” el a expresa.

 

Algo otro cu a hala atencion ta cu e dak tin varios panel solar, mustrando cu e famia ta sigui vision di Prome Minister Mike Eman.

“Nos tambe a pone panel solar y ta sperando aprobacion di Elmar. E ta algo semper nos tabata kier y nos a pone den ehecucion aña pasa. Nos ta compronde tambe cu e ta tuma un tiki tempo pa nos haya full e beneficio.

Den dia caba nos ta disfruta di e beneficio di uzo di coriente produci p’e panelnan solar. Nos ta para 100% tras di energia berde y nos ta apoya tur cos cu Gobierno actual ta haciendo pa nos di Aruba,” el a duna di conoce.

 

Top