Muscles and Lungs Crossfit yegando e final di Open Crossfit 2017 na Local Store na Noord

Awe diasabra 25 di maart pa 4or di atardi te cu 9or di anochi na Local Store na Noord lo tin e ultimo dia di competencia di Open Crossfit 2017 cu un tremendo stage traha dor di High Performance nos partner de deporte.

Nos tabatin 4 siman hopi druk cu e participacion di mas cu 70 atleta cada siman, ademas nos tabatin e bishita di e turistanan cu ta di vacancy na Aruba y nan a dicidi di pasa serca nos pa nan por participa den e diferente workouts

 

The Crossfit Games: T’e competencia mundial anual, unda nan ta busca e homber y muher mas fit. E atletanan di crossfit nan ta pasa den diferente face: Na february y maart t’e Open Mundial e mihornan nan ta clasifica pa Regionales, cu ta competi na mei y na juli nos lo wak e mihor atletanan di mundo competiendo p’e homber y muher mas fuerte di mundo

 

Open Crossfit 2017 lo wordo realiza conhuntamente rond mundo cu e participacion di tur box cu ta afilia n’e famia di Crossfit. E competencia ta hopi intenso y bunita pa wak.

E competencia ta conta cu un hurado pa cada participante y mayoria di biaha e participante tambe ta bira huez asina un ta controla otro, cada wor mester ta completo si no ta completo nan ta canta “no rep” y e tin cu haci’e te ora e ta bon, esey ta produci stress den e participante, pero nan ta siña cu e wod mester ta bon termina.

 

Cada siman riba diahuebs anochi tin e presentacion di e workouts pa siman y tin plazo te cu dialuna pa haci’e na workouts. E competencia ta mundial y tin e oportunidad di pone e puntahe n’e website oficial, unda nan por clasifica pa participa n’e competencia Regional.

E diahuebs despues di e presentacion di e workouts tin e participantenan internacional competiendo en bibo na TV y e ta bira un momento hopi emosionante di mira e grandinan di Crossfit midiendo nan fuerza.

Nos kier invita henter e pueblo di Aruba y e amantenan di  Crossfit por pasa disfruta di e ultimo dia di e competencianan

Top