Museo Arqueologico lo sera temporalmente pa trabounan di mantencion

Museo Arqueologico Nacional Aruba (MANA), situa na Schelpstraat 42, lo sera su salanan di exposicion pa publico, cuminsando diamars dia 28 di februari proximo, p’asina haci algun trabou di mantencion.

Entre otro e compania Aruba Climate Control (ACC) lo optimalisa e sistema di ‘airconditioning’. Den e mesun periodo lo ehecuta algun otro trabou pa haci e bishita na Museo Arqueologico uno mas agradabel pa e bishitante.

 

Pa motibonan di seguridad a dicidi pa sera porta di Museo pa algun tempo, p’asina e trabounan cu ta rekeri e.o. machin, stelage y otro equipo, por ser haci sin cu esaki ta forma un peliger p’e bishitante. Asina por haci e trabounan mas liher pa pronto habri nos Museo bek.

Encarecidamente Museo Arqueologico ta pidi comprension p’e situacion aki, cual ta haci cu e salanan di exposicion no lo ta acesibel durante e periodo aki.

Nos disculpa p’e inconveniencia.

 

Museo Arqueologico ta hopi agradeci na Ministerio di Cultura pa pone e fondonan necesario disponibel pa un sistema di airco nobo.

Den e periodo aki lo percura pa duna algun presentacion interesante, como tambe lo forma parti di algun otro exposicion na otro localidad.

Asina ta keda duna e servicio na publico di informacion tocante nos herencia cultural arkeologico.

Keda pendiente pa mas informacion riba nos paginanan di facebook: Nacional Archaeological Museum Aruba y Archeo Aruba. Lo sigui comunica den prensa tocante e actividadnan di Museo.

Top