Na apertura di HESI na Groningen Minister Yrausquin a ilustra e vision ambisioso di Aruba pa un sociedad 100 porciento duradero na 2020

DEN HAAG – Minister Plenipotenciario Juan David Yrausquin tabata invitado special na e apertura oficial di e facilidad Hybrid Energy System Integration (HESI) na e tereno di EnTranCe na Groningen. E acto oficial a tuma luga dor di Comicion di Rey na Groningen Rene Paas. HESI, ta un laboratorio na unda companianan por acudi pa cierto testnan y investigacionnan. TNO ta un partner grandi den e proyecto aki.

 

Prome cu e apertura oficial, diferente oradornan a tene un discurso riba tereno di energia duradero y e maneho sostenibil tanto na Hulanda como na otro paisnan.

Minister Yrausquin a wordo invita pa hunto den un panel pa papia rib’e balor adicional di un systema di HESI den e transicion pa energia duradero.

Na e ocasion aki sr. Yrausquin a elabora riba e vision ambisioso di Gobierno di Aruba pa yega na un sociedad y economia 100 porciento duradero na 2020.

 

Tambe e mandatario a papia rib’e construccion cu ta andando di e “Smart Community” na Aruba y loke e proyecto aki lo brinda na informacion util pa un maneho duradero pa futuro.

Mester bisa cu diferente orador a menciona e vision duradero di Aruba y e ehempel cu Aruba a bira rib’e area aki.

Top