Na caminda pa Clasificatorio pa Juegos Centro Americano y Del Caribe Aruba Softball Bond a reuni cu su atletanan di pre seleccion Masculino y Femenino brindando tur informacion di e Plan 2017

Aruba Softball Bond a reuni cu atletanan y Staff Tecnico siman pasa al respecto e Vision y Plan 2017. Aruba tin un chens unico pa prome biaha den historia desde status aparte pa trata na busca clasificacion den ambos genero, esta femenino y masculino. Manera ta conoci den mundo di deporte desde status aparte nunca un “teamsports” di Aruba a clasifica pa dicho Juegos.

 

ODECABE cu ta e organisacion cu ta organisa y maneha e weganan aki a amplia e puesto di clasificacion di 6 pais pa 7 pais y asina brinda islanan den Caribe un oportunidad mas estrecho pa clasifica.

Alaves tin desaroyo nobo na nivel di ODECABE unda antes paisnan cu no tin un NOC (Committee Olimpico Nacional) no lo por clasifica y competi den Juegos Centro Americano y Del Caribe. Cu un decision nobo recien a permiti paisnan manera Corsou, St. Maarten, Turks & Caicos y Anguila pa bira miembro asocia pues sin derecho di voto pero ta habri caminda pa e paisnan (islanan) aki por bay clasificatorio.

Clasificatorio femenino cu salida 3 di augustus y regreso 14 di augustus y masculino cu salida 14 di september cu regreso 25 di september ambos na Sto. Domino e capital di Republica Dominicana. E 7 paisnan cu clasifica den ambos genero lo ricibi e pasaporte pa drenta Juegos Centro Americano y Del Cariba cual lo tuma luga desde 20 di juli 2018 na Baranquilla Colombia cu alrededor 5700 atleta participando den mas di 35 disciplina.

 

Aruba Softball Bond mediante su presidente durante reunion cu atletanan a bay den hopi detayes p’asina pone e atleta sinti e importancia di e clasificatorionan den 2017 y laga nan haci un compromiso cu nan pais Aruba unda nan por bay den historia si logra clasifica.

Manera presidente Endy Croes a splica cu nada ta bin por nada y pa nos logra nos mester sacrifica y traha super duro. Asistencia di atletanan tabata masal y reacionnan ta hopi positivo.

 

Entrenamento masculino a inicia caba tur dialuna y tur diahuebs na veld di Flatstone y esaki lo amplia den april na 4 pa 5 biaha pa siman. Entrenamento femenino ta inicia e siman despues di Carnaval. Pues atletanan tin un reto y un compromiso pa nan pais y ohala cu trabounan duro nos por logra nos meta, esta di clasifica pa Juegos Centro Americano y Del Caribe.

Alaves nos pre seleccion U18 tambe lo inicia cu entrenamento y lo tin un compromiso den luna di augustus na Panama. Pues Softball ta a la carga.

Top