Na instalacion punto nobo di luz di caya na Moko Eman a señala e importancia di luz y polis den bario: Mas luz combina cu Polis di Bario ta promove mas seguridad

Luz den bario combina cu presencia di Polis di Bario ta algo cu Prome Minister Mike Eman ta kere cu por complementa otro, yuda den e meta di preveni y combati criminalidad.

Esaki ta un tema cu a combersa riba dje durante e ceremonia instalacion di puntonan nobo di luz den e barionan di Moko y Jaburibari.

 

Durante e ceremonia di instalacion e bario mes a invita e funcionarionan di Polis den Bario mirando e laso estrecho cu tin entre e dos bandanan aki, cual ta un ehempel cu mester wordo sigui den otro barionan di Aruba.

N’e ocasion aki a wordo indica cu e programa di Gobierno di Aruba yama “Luz den Bario” ta importa pa trafico di Aruba tambe, principalmente den areanan manera Moko y Jaburibari unda tin hopi curzada y loradanan peligroso, specialmente si no tin bon luz.

 

Presencia di Polis di Bario, e mandatario a bisa, ta duna e habitante un mihor sentido di siguridad. Polis di Bario, el a sigui bisa, ta duna e habitantenan e sentimento cu nan ta wordo cuida dor di Polis cu ta mucho mas serca di nan.

“E seguridad di cada famia den e bario aki na Noord ta preocupacion y tarea di Polis di Bario. Nos ta spera cu den e periodo nos dilanti stimula mas e idea di Polis di Bario.”

 

Durante e Accion di Bario na Moko y Jaburibari Prome Minister Eman a papia cu hopi habitante y diferente di nan, segun el a bisa, a expresa di ta aprecia masha hopi presencia di Polis den bario.

“Kisas den Cuerpo mes no ta dje consciente mes con hopi e habitantenan ta aprecia e funcion di Polis di Bario.

E ta algo cu nos por stimula pa henter e Cuerpo sinti nan mes gradicido ya cu ora nan bay haci trabou den bario nan lo sinti cu esaki ta algo cu ta wordo masha hopi aprecia, pero necesario tambe.”

 

E mandatario durante e combersacion a bisa tambe cu den e contacto cu Gobierno tin cu e bario ta masha importante pa envolvi funcionarionan di Polis di Bario. Ademas mester duna e importancia di e Cuerpo aki cu esun mas cerca den e barionan pa yuda preveni y combati criminalidad.

Durante e ceremonia pa inicio di instalacion di puntonan nobo di luz den e bario di Moko, unda cu habitantenan di Jaburibari tambe tabata presente, por a constata cu tin un bon contacto entre e funcionario y e habitantenan.

Gabinete Mike Eman I na 2013 a cuminsa cu e programa di “Luz den Bario”. Den e actual Gobernacion a tuma e decision hunto cu Utilities Aruba NV cu lo instala 12 mil luznan di tipo LED, di cual 9 mil ta pa cambia e luznan bieu di caya y e resto ta pa crea puntonan di iluminacion nobo den e barionan cu pa hopi tempo, tin biaha decadanan largo, a biba den scuridad.

 

 

Top