Na Rusia mas di 200 persona a wordo deteni durante manifestacion contra Presidente Vladimir Putin

E agencia di prensa oficial ruso (TASS) a informa cu polis a aresta diadomingo mas di 200 persona cu a congrega den centro di Moscow den un manifestacion, no autorisa, contra e Presidente Vladimir Putin.

“E number di persona deteni awor ta di mas cu 200”, tabata e declaracion di un fuente policial, despues di e concentracion di un grupo di oposicion prohibi cerca di e Kremlin.

Segun polis, 263 persona a keda deteni “pa altera ordo publico. Tur a wordo hiba na diferente warda di polis local”.

 

E lider opositor Viacheslav Maltsev, kende tabata candidato pa eleccion legislativo na 2016 y cu tin un canal politico riba YouTube cu ta conta cu hopi followers, lo ta esun cu a convoca e comunidad pa un manifestacion masal diadomingo rond Rusia, pidiendo un “revolución popular” y pa pone punto final inmediatamente n’e mandato di Vladimir Putin.

 

E servicio di seguridad ruso (FSB), a bisa diabierna cu nan a detene un grupo di partidario di Maltsev cu tabata planiando di realisa “accionnan extremista di amplitud”, entre nan pega oficinanan na candela y atakenan contra agentenan policial, durante e weekend cu a caba di pasa.

Leave a Reply

Top