Na Trinidad & Tobago: Agentenan di biahe no por bende ticket di InselAir mas!

WILLEMSTAD – E noticia cu IATA a schòrs InselAir como miembro di nan programa di Clearing Bank cu ta caminda companianan di aviacion ta depositá e placa di pasashi ora nan bende ticket di otro compania cu no ta riba nan mes buelo, ta un noticia grave.

E ta afectá e reputacion di InselAir internacionalmente y ta pone cu agencianan di biahe den stranheria cu tabata bende pasashi cu InselAir, awor no mag haci esey mas.

 

Biaheronan internacional y local na Trinidad & Tobago cu kier biaha cu InselAir tecnikamente no por reserva y paga un pasashi cu InselAir, pasobra entrante inmediatamente IATA, International Air Transport Association, a suspende InselAir como miembro participante n’e organisacion.

Esey nificá cu InselAir tampoco por bende pasashi cu biaheronan di T&T cu otro companianan di aviacion.

Den e caso aki no tin otro compania di aviacion regional cu ta bula entre Corsou y T&T cu no ta SLM.

 

Den e comunicado di IATA nan ta anunciá cu nan a suspende InselAir entrante inmediatamente di acuerdo cu nan reglanan di Resolucion 850.

Resolucion 850 ta dicta cu ora IATA schòrs un compania miembro agencianan di biahe ta desconectá e compania for di e centro via cual ta transferi data y fondo di pasashi cu e agentenan bende.

Esey ta pa evitá cu cada agencia di biahe tin un areglo director cu e companianan di aviacion.

IATA a ordená su asociadonan pa suspendé tur benta di pasashi di InselAir inclusivo uso di tur sistema di còmputer pa procesá pago of restitucion di pasashi cu ta corespondé na InselAir.

 

E agentenan afiliá na IATA mester stòp di usa nomber di InselAir inmediatamente.

Agencianan di Biahe cu tin cu haña sèn of tin cu paga InselAir tin cu regla esaki inmediatamente cu InselAir y no via e Clearing Bank di IATA.

Tampoco nan mag mishi cu fondonan cu nan debe InselAir. Si tin agencia di biahe cu a manda paga e Clearing Bank placa cu nan debe, pasobra nan a bende pasashi di InselAir nan tin cu adaptá e pago di loke nan debe.

 

Preferiblemente nan ta pidi e agentenan di biahe pa paga InselAir directamente y no via nan conexion den IATA.

IATA no kier suma di placa abultá cu agentenan di biahe depositá riba e cuenta di Clearing Bank pasobra esaki ta contra ley na Trinidad & Tobago.

Di tur manera tur placa cu agencianan di biahe manda pa Clearing Bank di IATA, ta keda den nan deposito te ora caba di analisá kico ta bay haci cu e placa, pasobra tin regla bankario severo riba e asunto aki.

Tin posibilidad cu IATA tin cu paga InselAir e placa na lugar di restituyé n’e agencianan di biahe. Pa cualkier otro pregunta IATA ta referi nan na InselAir.

Top