Nada riba Sint Maarten den acuerdo di Gobierno: Ni un palabra cu Hulanda lo financiá reconstruccion

PHILIPSBURG – Ta di suponé cu na Sint Maarten ni e pueblo ni nan gobernantenan lo no a ricibi cu masha entusiasmo e anuncio cu partidonan politico na Hulanda a forma un Gabinete nobo, pasobra contrario na loke e Gabinete saliente a priminti, e partidonan no a dedicá ni un palabra na duna placa pa reconstrui Sint Maarten.

 

Sector privá sí a cumpli cabalmente caba y di acuerdo cu informacion digno di crédito, for di dialuna ultimo ENNIA a cuminsa re-embolsá e clientenan cu tin propiedad cu a sufri daño.

E coalicion Hulandes nobo a dedicá mas atencion n’e situacion na Venezuela y ki consecuencia e éxodo di Venezolano por tin pa Corsou cu n’e situacion na Sint Maarten cu ta realmente grave.

Tabatin basta positivismo despues di e bishita di Minister Roland Plasterk n’e isla hunto cu Rey Willem Alexander, kende a declará enfaticamente cu Hulanda lo reconstrui e isla.

 

Wèl t’asina cu Hulanda a manda basta material manera 12 auto di Polis, 10 trùck di hala carga y masha bulto di cuminda y otro material di construccion.

Sinembargo un barco cu material no ta suficiente pa reconstrui e isla duraderamente ademas cu den seno di expertonan a lanta e pregunta cu si ta bal la pena pa reconstrui mes mirando cu un proximo orcan fuerte lo por kibra tur cos atrobe. Pero esey no ta cos cu por pronosticá sino ta caprichonan di naturalesa.

E loke a impresioná t’e falta di algun palabra riba e reconstruccion di Sint Maarten siendo cu e coalicion nobo a bisa cu nan kier lasonan mas estrecho cu e islanan den Caribe.

 

Loke sí nan a pone como condicion ta cu mester tin bon gobernacion, pero si esey tin cu manifestá su mes den remplasa alto funcionarionan di Gobierno pa Hulandes-Europeo, politiconan local mester lanta for di soño y vigilá te na unda Hulanda kier yega cu e intencion ey.

Diamars e partidonan VVD, CDA, D66 y ChristenUnie a presentá nan programa despues di 7 luna di deliberacion.

Lo mas importante pa nan ta ‘Integridad’ y nan a laga entrever y a insinuá cu nan por manda instruccion y tuma medida riba tereno di gobernacion riba nos islanan.

 

Di un forma masha elegante nan ta señalá cu e relacion den Reino ta crea responsabilidad tambe specialmente ora ta trata di garantisá integridad di gobernacion.

Pa loke ta proteccion di nos fronteranan, Gobierno di Reino lo aportá n’esaki den cuadro di nan responsabilidad cu Statuut a stipulá.

 

INTEGRIDAD, INTEGRIDAD, INTEGRIDAD…..

Esey te palabra cu e coalicion nobo lo usa den tur accion cu nan kier inicia riba Aruba, Corsou y Sint Maarten, pero tambe riba e municipionan Hulandes den Caribe cu ta Bonaire, Saba y Sint-Eustatius.

Nan ta dispuesto pa inverti placa èxtra den e islanan bou di condicion cu nan mester tin garantia  cu tin bon gobernacion y cu Gobiernonan por duna cuenta y razon cu nan a gasta.

 

VENEZUELA

E coalicion nobo ta haña cu cooperacion entre e islanan autónomo ta èxtra necesario y di un manera constructivo.

Tambe pa motibo di e crisis cu Venezuela ta pasando aden y cu tin su efecto riba nos islanan dilanti costa di Venezuela.

Pasobra si e crisis Venezolano afectá nos islanan, e ta afectá Hulanda tambe como parti di Reino.

O sea p’e situashon turbulento y critico den ‘algun pais bisiña’ e cooperacion mester ta èxtra necesario.

 

MAS PLACA PA COMBATI DROGA

Tambe e coalicion nobo ta determina pa inverti mas placa pa combati traficacion di droga y imigracion ilegal for di otro pais pa Aruba, Corsou y Bonaire.

Pa tal motibo Hulanda lo inverti 10 mion euro adicional den Guardacosta den Caribe y esey ta dos mion euro mas di loke nan a pone originalmente riba presupuesto di e gabinete saliente.

Pero ni asina e suma ey no ta suficiente pa reparacion y mantencion di e material necesario.

Loke nan lo haci ta hinca e presupuesto di Guardacosta den presupuesto di Ministerio di Defensa p’e aparato por funcioná eficientemente. Cu otro palabra: Ministerio di Defensa Hulandes lo manehá Guardacosta.

 

Leave a Reply

Top