Nan lo bula 2 bes pa siman pa Orlando, Florida for di Aruba

Dialuna ultimo, Surinam Airways a anuncia cu nan a expande nan destinacionnan pa Florida cu dos buelo pa siman bulando for di Aruba, pa Sanford International Airport na Orlando.

Ya caba Surinam Airways a bira masha popular riba e ruta di Aruba pa Miami, bulando 4 bes pa siman y awor ta agrega dos buelonan mas pa siman. Nan ta buelonan non-stop.

 

Di e forma aki, Surinam Airways kier ofrece su clientenan mas alternativa pa Florida. Sabiendo cu den high season, hopi t’e pasaheronan cu ta prefera di bula pa Miami, unda nan por huur un auto pa sigui pa Orlando, pero cu e expansion aki, e lo beneficia sigur e biaheronan cu Surinam Airways.

 

Nan ta unico compania di aviacion cu ta sirbi cuminda cayente den henter e avion cu bebida gratis. Nan ta unico compania tambe cu no ta cubri pa maleta, cu ta gratis.

Ta dia 3 di april awor, e buelonan aki lo keda inaugural pa Orlando, bulando for di Aruba pa 1or di merdia, tur dialuna y ta bolbe diamars pa 4.30 di atardi.

Entrante 3 di juli, lo tin dos buelo pa siman, bulando diabierne saliendo for di 11 or y bolbe mesun dia pa 4.30 di atardi.

 

Surinam Airways ta bula un Boeing 737-300 cu un capacidad di 119 asiento y ta haci tur pre-clearance na Aruba. Esaki nifica cu unabes na Orlando, Surinam Airways ta drenta como un buelo domestico.

 

 

Leave a Reply

Top