Natalie Maduro di Santa Rosa: Prome Minister Mike Eman a bishita mas cunukero pa tende kico ta nan plan y deseo

Diasabra ultimo, for di mainta tempran, Prome Minister Mike Eman a sali riba un recorido di cunukunan rond di Aruba.

Natalie Maduro, como Director di Santa Rosa, a guia e bishitanan caminda Minister President a conoce e productornan local di berdura, fruta y tambe cria di bestia.

Maduro a confirma cu e bishitanan lo continua, como parti di e Minister di Sector Primario su vision pa sigui sostene y promove e industria.

 

“Aunke Prome Minister Eman ta bin di un famia cunukero, manera su ruman homber, tog nos tabata kier p’e haya un idea di ki tipo di plantacionnan tin y mi ta kere cu el a keda hopi impresiona awe,” Maduro a bisa.

E ta referi n’e hecho cu a bishita cunukeronan cu ta uza sistema tradicional, pero tambe esnan cu tin sistema mas moderno, manera sistema hidroponico.

 

“El a haya un impresion chikito di kico e cunukeronan ta bezig cu ne Aruba,” e Director di Santa Rosa a splica.

Ainda tin hopi cunucu pa bishita. Di parti di Minister President Eman, ta ancioso di wak y conoce mas.

Su vision p’e industria yuda den un futuro sercano Aruba por importa menos y produci mas localmente.

 

Natalie Maduro a expresa di ta hopi contento cu e boluntad y disponibilidad di Prome Minister. “Asina e mes por scucha for di e cunukeronan kico ta nan plan, kico ta nan deseo, pero tambe kico ta nan exitonan den loke nan ta produciendo.”

 

Top