N’e reciente torneo di Spaans Lagoen a homenahea, varios baluarte. Un di nan tabata Alfred Leslie, kende pa kebrante di salud no por tabata presente, pero sigur un y tur a sinti su falta y a manda aplauso di pronto recuperacion pa su persona. Su yiu y nieto tabata presente n’e ocasion y lo traspasa e aceptacion di e publico su persona. Durante e ceremonia diasabra atardi, sr. Vito Carolina a trece lo siguiente pa dilanti. John Athelbert Alfred Leslie t’e ultimo piscado mohicano di Pos Chikito. E ta un persona cu por a disfruta di pisca cu diferente generacion di piscadornan Arubano. Na edad jong, el a pisca cu Luis Carrion y Ave Croes, den e epoca di pisca den canoa, pisca cu haas bibo, secat di pia y balahu. E tempo ey, no tabatin cuenta di cumpra haas. Bo mes tin cu coy bo haas si bo kier ta un piscador. E ta un maestro tirado di taray. E mes tabata coy sardin, piskechi y balahu. E tempo ey tabatin hopi balahu den Spaans Lagoen. Bo tabatin cu lanta marduga bay cu canoa pa bo coy balahu cu taray. Despues el a pisca pa hopi tempo cu Clemente Carrion, Doy Johnson, Ruby Croes, Karel Hodge, Emiliano Peña y Alfonso “Fon” Henriquez. Djey, el a pisca pa hopi aña cu Victor “Vito” Carolina. Den e ultimo añanan aki, el a pisca cu Alex Farro, Luis Rasmijn, Agapito Albertsz y Laurence Courtar. Dicon tur e hendenan aki a pisca cu Alfred? Pasobra e tin un energia positivo enorme. Bo dia di pesca cu Alfred lo ta alegre y placentero y ora bo yega tera, apesar cu e pesca por a bay bon of zwak, semper e tin un sonrisa riba su cara. Su bida, ta lama. Ki ora bo puntr’e pa bay lama, e ta dispuesto anytime pa bay. No ta importa si ta den dia of anochi y semper e ta madrugador. Si bo pone pa ta na boto 4’or di marduga, e t’ey ya pa 3’or caba. Si bo bay pisca cu Alfred bo sa sigur cu ta bay tin pisca, pasobra e ta un homber di suerte. No solamente, e ta un bon piscado, tambe e ta un persona cu gusta duna un man pa yuda otro. N’e pier di Centro di Pesca Spaans Lagoen, ora bo yega marduga, bo ta hañ’e ta piki sushi riba su mes, sin ningun reclamo of kiek. Te hasta un bijnaam el a haña na centro di pesca: “Corta pisca estilo Alfred”. E nomber ey a bin dor cu e ta corta pisca pa tur hende sin cu nan tin cu pague algo pa corta pisca. Tur piscador di Spaans Lagoen ta sumamente orguyoso y contento di tin Alfred Leslie como ehempel pa nos tur y futuro piscadornan.

Diarazon anochi pa 9.30, riba e caminda di Caya Betico Croes, na altura di Codemsa, un auto Nissan Almira A-23467 cu tabata bay direccion Sta. Cruz ora el a yega e cruzada di Avenida Watty Vos a dal den e auto Toyota Yaris A-43004. E ultimo aki a subi sin duna preferencia. Un total di 6 persona a keda herida, pa cual mester a manda dos ambulance n’e sitio pa yuda transporta e victimanan pa Hospital. Un total di 4 mucha ta den e heridonan cu tambe a ser manda Hospital.

Top