Net riba Dia di Hende Muher Minister Michelle Hooyboer Winklaar a sorprende tur hende cu su retiro for di politica

E tabata invita pa hiba palabra durante e conferencia di Hende Muher na Renaissance Convention Center, cu Minister Michelle Hooyboer Winklaar a sorprende tur presente cu e lo participa mas riba lista di candidato di AVP y ta retira despues di su periodo for di politica activo,

 

Di biaha a surgi un cantidad di pregunta di e.o. ta kico a pasa, siendo cu Michelle Hooyboer Winklaar a haci hopi pa enseñanza di Aruba y sigur tin hopi mas trabao pa termina. A cuminsa cu un cantidad di speculacion.

Pasobra el a haci e participacion aki, sin prome a notifica e.o. dirigencia di AVP, ni tampoco Conseho di Minister di su decision di retira for di politica definitivamente.

 

Ta manera e mes a bisa: “Mi ta bay comparti un secreto cu boso. Mi no ta  participa den proximo eleccion. Ta tempo pa un otro persona tuma e responsabilidad aki”.

Manera Michelle Hooyboer-Winklaar mes a bisa, cu e tabata un secreto cu el a wanta y ayera mainta, ora cu el a toca e topico di su discurso: “Hende Muher den politica”, a dicidi di haci e participacion aki.

 

Maske te ainda e decreto di eleccion no ta firma ainda, ta manera Prome Minister Mike Eman a bisa caba, cu eleccion lo ta dia 22 di september 2017.

Michelle Hooyboer Winklaar, despues di un exitoso carera comercial, a keda aserca pa dos partido politico pa subi lista, pero el a prefera lista di AVP y asina el a participa n’e dos ultimo eleccionnan.

Michelle Hooyboer Winklaar a ocupa e cartera di Minister di Asunto Social y Economia den Gabinete Mike Eman I y awendia ta terminando su di dos periodo como Minister di Enseñansa y Famia den Gabinete Mike Eman II.

 

Mucho motibo e no a duna, pero e ta kere cu dos termino ta suficiente y cu awor ta bon pa habri caminda pa hobennan sigui guia e pais aki. Maske cu den partido mes, ta ser bisa cu ultimamente e relacion cu lider di partido y Prome Minister Mike Eman no ta mucho bon.

Michelle Hooyboer-Winklaar no ta atende reunionnan di Conseho di Minister, pa demostra su disgusto cu demas miembronan di e Conseho.

 

Un cos ta sigur, e no ta sigui active politicamente, y sigur no ta su intencion pa afilia na un otro organisacion politico. No ta kita afo, cu Michelle Hooyboer Winklaar ta rabia y a gradici p’e carera aki.

E oficina cu ta haci su PR, a keda di emiti un declaracion oficial, pero te na momento cu nos ta relata e noticia aki, dicho PR no a drenta.

Top