Niagara College ta bek pa duna informacion na tur studiante interesa di sigui studia na Canada A firma acuerdo final: Studiantenan lo beneficia di Scholarship

 

Manera Minister di Enseñansa Michelle Hooyboer-Winklaar a anuncia un par di siman atras, a logra cera un acuerdo mas cu un instituto di educacion superior na Canada.

Den e caso aki, Niagara College den a area di Niagara Falls. Despues di e anuncio trabaonan a sigui pa finalisa e acuerdo y yega na e punto pa firma.

 

Durante e siman cu a pasa representantenan di Niagara College tabata na Aruba pa promove un opcion mas pa studiantenan sigui nan educacion superior. Hunto cu esaki Ministerio di Enseñansa a haci uzo di e oportunidad y a crea un programa completo di informacion.

E programa a inclui bishita na diferente scol rond di Aruba y a termina cu un anochi informativo pa publico en general.

 

“Nos ta hopi contento cu nos tin di bishita representantenan di Niagara College, cu awor ta un partner formal di Aruba mirando cu nos a caba di firma un acuerdo. Minister di Enseñansa a firma un acuerdo pa un scholarship special pa studiantenan di Aruba por bay studia na Niagara College”, asina James van der Linden di Ministerio di Enseñansa a amplia.

El a splica cu Niagara College ta e di 4 instituto Canades cu Aruba ta cera un acuerdo formal cune. E acuerdo ta encera incentivonan special, den e caso aki, un scholarship cu por haci studiamento na Canada mas acesibel y mas pagabel.

 

“Nos ta hopi contento cu e acuerdo y nos ta hopi contento cu nan a bin Aruba pa formalisa e acuerdo. Nos a haci mesora un bon uzo di e oportunidad cu nan ta na Aruba pa asina traha un programa completo caminda cu nos a bishita scolnan. Tambe tabatin diferente reunion cu diferente instancia pa wak con nos por expande e colaboracion. Awe nochi nos a finalisa e dia cu un sesion informativo pa publico habri pa mayornan, studiantenan y educadornan cu ta interesa di haya mas di e scol aki”, el a informa.

 

James van der Linden a sigui bisa cu nan ta hopi contento cu e publico cu a acudi. “Tabatin hopi pregunta y tambe bo ta mira e interes ta creciendo mas y mas pa e opcion di Canada, cu ta resulta hopi bon pa esunnan cu opta pa studia uzando e idioma Ingles”.

 

Por nota cu e studiantenan tin hopi afinidad cu e idioma Ingles, o sea, Merca of Canada… “pero Canada compara cu Merca awor akinan ta hopi mas pagabel. Cu e acuerdonan e ta birando ainda mas economico, asina ta nos ta hopi contento cu esey. E intencion claro ta pa sigui expande e acuerdonan y di expande e acuerdonan existente tambe cu otro beneficionan pa nos studiantenan”, segun e consehero di enseñansa pa Ministerio di Enseñansa.

 

Kistine Lacle cu ta atendiendo Avond Mavo na EPI a haya cu e anochi tabata uno hopi informativo. “El a duna mi hopi mas gana di bay Canada y mas ainda den e area di Niagara Falls. Mi a gusta tur loke e meneer a bisa. E ta hopi constructivo. Mi tabata planea di bay studia na Hulanda den area di Rotterdam pero manera e meneer a bisa, bo bay Hulanda bo tin cu bay adapta bo mes na nan estilo di bida, con nan ta. Mi a wak cu manera nan a splica na Canada bo por ta bo mes y nan ta interesa di unda bo a bin cu ta duna mas gana di bay Canada awor,” Kistine ta haya.

 

“Manera Minister Hooyboer-Winklaar a bisa e ta hopi mas barata pa bay Canada compara cu Hulanda pasobra tin e fiansa pero dor di cu e porcentahe di interes ta mas abao miho bay Canada cu pensa pa bay Hulanda,” Kistine Lacle a remarca.

Leave a Reply

Top