Ningun di dos ta contento cu veredicto di 10 aña di prison, abogado como Ministerio Publico a dicidi pa apela

For di principio abogado, mr. Chris Lejuez di e muher Chinees, kende a ser acusa di a mata Richard Fingal a laga sa cu e lo conseha su cliente pa apela e veredicto di 10 aña cu Huez di Corte di Prome Instancia a dicta, pasobra e ta sigur cu e Chinees a mata e Director di Serlimar den defense propio.

E cliente a sigui e conseho y a dicidi di apela.

 

Pero di banda di Ministerio Publico, e Fiscal tambe a dicidi di apela, maske e ta poco straño pasobra Huez a dicta sentencia segun e demanda di Fiscal, esta 10 aña sera.

Pero via di vocero di Ministerio Publico, nos por a compronde cu Fiscal a dicidi di apela, unabes cu abogado defensor, Chris Lejuez a dicidi di apela y como tal Fiscal tambe a apela.

 

Motibo ta, manera por corda, na principio di tratamento di e caso, e Fiscal a pidi Huez pa pospone e caso, pa por haci mas investigacion, pero Huez a rechaza dicho peticion.

Y ora e Fiscal a dicidi pa sigui cu e caso, pero e señora Chinees a keda huzga pa homicidio, siendo Fiscal ta di opinion cu e señora Chinees a comete un asesinato e.o. premedita, pa cual tin castigo mas halto cu 10 aña.

 

Apelando, ta duna e Fiscal pa sigui cu su investigacion e.o. Hulanda lo yuda pa sa e combersacionnan cu tabatin riba e celular.

Si Fiscal por comproba cu aki por papia di un asesinato, lo nifica “a whole new ballgame”, unda sigur e lo demanda un castigo mas halto cu e 10 añanan duna.

Si durante tratamento den Corte di Apelacion, Fiscal no por demostra nada adicional, manera desea, lo retira su apelacion y lo keda cu e 10 aña ya imponi como castigo di prison.

 

Interesante sigur e caso hudicial aki ta keda, sperando cu e investigacion pa trece mas claridad den asesinato di Richard Fingal, Director di Serlimar.

 

 

Top