Ocasionando cu mitar di e habitantenan a bira “halto” cu e holor – Ehercito colombiano ta kima 840 kilo di marihuana na un ciudad di e pais cafetero

E huma cu holor fuerte a keda bay rond di e ciudad capital di departamento di Caquetá., como cu e militarnan a dicidi di kima 840 kilo di marihuana den nan kazerne, cu ta keda den un bario central di e ciudad di Florencia.

 

Un di e habitantenan di e bario serca di e kazerne a bisa “tin masha hopi huma y hendenan a cuminsa keha pasobra nan ta bisa cu e militarnan ta kimando un marihuana cu nan a haya, y aki den bario nos ta halto caba”.

Pero no solamente e habitantenan ta esnan cu a keha di e holor fuerte, un gran cantidad di turista cu tabata di bishita n’e ciudad tambe a sinti e holor y su efectonan.

 

E holor a hasta yega te n’e Centro Policial di e ciudad, y segun loke Coronel Javier Navarro Ortiz a bisa ta cu e cantidad di yamada cu a drenta n’e liña di emergencia tabata asina grandi cu a obliga nan pa sali y mira ta kiko tabata pasando.

 

Ehercito Colombiano a bin dilanti dialuna y a splica cu e hecho tabata un procedimento cu a conta cu aprobacion di e Fiscalia Nacional colombiano.

 

“Mi tin cu disculpa mi mes cu e comunidad pa cu e fayo, pasobra e impacto negativo tabata halto. El a wordo kima den e kazerne cu ta keda den e sector di poligono y nos no a pensa cu e lo afecta asina. Sin embargo, awa tabata yobe, tabatin hopi factor negativo”, General Cesar Augusto Parra, a declara.

Top