Oficina Central di Estadistica ta organiza di 3 di november pa 4 di december 2017 un estudio di telecomunicacion na Aruba.

Oficina Central di Estadistica (CBS) ta organiza den e periodo di 3 di november pa 4 di december 2017 un estudio di informacion y (tele)comunicacion na Aruba yama “ICT 2017”.

E meta di e estudio ta pa obtene informacion tocante e acceso cu personanan y hogarnan na Aruba tin na diferente medio moderno di (tele)comunicacion, entre otro e acceso na computer, celular y internet. E encuesta di ICT ta duna alavez un bon bista di e grado di digitalisacion di nos comunidad.

Lo trata topiconan relata na e uso di e medionan moderno aki, por ehempel: e frecuencia di e uso, e motibo di e uso y e conocemento di e programanan di computer. Tambe lo trata topiconan manera nivel di educacion, participacion laboral y entrada, como cu e topiconan aki ta relaciona na e acceso y uso di medionan moderno di (tele)comunicacion.

Na Aruba, como tambe na nivel internacional tin gran interes pa midi y alavez mehora e accesibilidad di computer, internet y celular pa un y tur. Durante e ultimo añanan, diferente organisacion internacional a promove e midimento di e grado di digitalisacion di paisnan ya cu esaki ta duna un indicacion di e nivel di desaroyo di un pais y tambe di e posibilidadnan pa innovacion.

Grupo di estudio

E estudio di ICT ta parti den 3 grupo di estudio. Pa e prome grupo di estudio ta consisti di 1200 hogar cu lo wordo bishita door di 12 encuestador di CBS. E hogarnan aki lo wordo entrevista pa medio di un encuesta digital, conduci personalmente na  e hogarnan. E segundo grupo di estudio lo wordo bishita door di 2 encuestador di CBS y ta consisti di 200 hogar. E hogarnan aki lo haña e oportunidad di haci e encuesta nan mes, online, pa medio di e uso di nan propio e-mail. E motibo di e bishita di e encuestador(a)nan por tanto ta pa colecta por lo menos un (1) e-mail di e personanan di e hogarnan en cuestion, pa asina CBS por manda nan un invitacion pa nan por haci e encuesta online. E tercer grupo di estudio cual tambe lo ta un grupo di 200 hogar, lo wordo bishita door di 2 encuestador di CBS pa asina nan ricibi un code cu cual nan lo por log-in riba e website di CBS y haci e encuesta di ICT, tambe nan mes. Cu e tres metodonan aki CBS kier pa medio di e estudio di ICT midi tambe e interes di e hogarnan pa cu e diferente manera di coopera cu CBS su encuestanan.

En total tin 16 encuestador(a) cu lo ta na encargo pa conduci e entrevista cu e hogarnan selecta, cu a wordo escohi arbitrariamente y ta reparti over di henter Aruba. Cada encuestador lo wordo asigna un area specifico pa haci nan entrevistanan. E encuestador(a)nan di CBS por wordo reconoci mediante di un badge cu nan number, portret y e stempel di CBS. E informacion obteni y tambe e-mail adres colecta lo wordo procesa di un manera completamente anonimo y lo wordo usa unicamente pa genera estadistica agrega. Despues di e investigacion e informacionnan colecta lo ser procesa pa traha tabelnan estadistico y e resultadonan lo ser presenta na publico pa medio di un publicacion. Tur encuestador envolvi ta obliga pa ley di tene secreto tur dato confia na nan.

E cooperacion di comunidad ta di gran importancia pa haci e investigacion un exito.

Di antemano nos kier a gradici pa e cooperacion duna na e investigacion aki.

Leave a Reply

Top