Oficina Central di Estadistica ta presenta resultadonan principal di Indice di Prijs di Consumo (CPI) pa luna di april 2017

E CPI pa luna di april 2017 ta 116.42, loke ta representa un caida leve di 0.02% compara cu e indice di maart 2017 (116.44) y acumulando un caida di 1.3% te cu na april di e aña aki.

E cambio di e CPI p’e ultimo diesdos (12) lunanan (April 2016 te cu April 2017) ta -0.1%, un subida di 1.5 punto di porcentahe (ppt) compara cu e periodo corespondiente di aña pasa (-1.6%).

 

E promedio anual di e tasa di inflacion p’e periodo di april 2016 te cu april 2017 ta -0.6%, un caida di 0.4 ppt compara cu e -0.2% registra den e periodo di april 2015 te cu april 2016.

Durante e luna aki, cuatro (4) di e diesdos (12) sectornan a registra caida di prijs.

E caidanan cu tabatin e mayor efecto riba e CPI a wordo registra p’e sectornan di “Recreacion y cultura” (-1.1%) y “Mobilario” (-0.3%), causando un efecto di -0.09 y -0.02 ppt, respectivamente.

E caidanan den e restante sectornan a contribui cu un efecto di -0.01 ppt riba e CPI di april 2017.

 

E caidanan aki a wordo contraresta parcialmente dor di principalmente subidanan den e indicenan di e sectornan di “Transporte” (0.2%), “Cuminda y bebida no-alcoholico” (0.1%) y “Vivienda” (0.1%), cu a contribui cu un efecto di 0.03, 0.02 y 0.02 ppt riba e CPI di april 2017, respectivamente.

E subidanan den e sectornan restante a contribui cu un efecto di 0.03 ppt riba e CPI di april 2017.

E caida den e sector di “Recreacion y cultura” a wordo causa principalmente dor di un caida di 7.7% den e categoria “Ekipo audiovisual, fotografico y pa procesamento di informacion”, causando un efecto di -0.06 ppt.

E caida den e sector di “Mobilario” a wordo causa principalmente dor di un caida den e categoria “Aparato pa uso domestico” (-3.1%), causando un efecto di -0.02 ppt.

 

E subida den e sector di “Transporte” a wordo causa dor di un subida di 7.0% den e categoria “Servicio di transporte”, causando un efecto di 0.09 ppt.

E subida den e sector di “Cuminda y bebida no-alcoholico” a wordo causa dor di un subida den e categoria “Cuminda” (0.2%), causando un efecto di 0.02 ppt.

E subida den e sector di “Vivienda” a wordo causa dor di un subida di 0.1% den e categoria “Huur di vivienda”, causando un efecto di 0.02 ppt.

 

Leave a Reply

Top